بلوچ یکجھتی کمیٹی ءِ سروک ءُ زور بیگواھیں ڈاکٹر دین مھمد ءِ جنک سمی دین ءَ مشکے ءَ اھوالکار ابُدلتیپ ءِ کوش ءِ پژدرءَ وتی شنگ کرتگیں درشانے ءَ گوشتگ کہ مشکےءَ دوشی نامداریں اھوالکار ءُ انتھاب ءِ جھگیر ابدُلتیپ ء جان مھمد ءَ ریاستی کارمنداں شپ ءِ سے ءَ وپتگیں واب ءَ کھول ءِ دیم ءَ تیرگواری کرتگ ءُ کشتگ۔ چوش کہ چہ ایشی ءَ پیش 28 پروری ءَ ابدُلتیپ بلوچ ءِ گس ءَ یکیں کھول ءِ ھشت ورنا برگ ءُ بند کنگ بیتگ اَت، چہ آیاں پیسر ءَ چار ءُ پد ءَ آدگہ چار کشگ ءُ آیانی لاش چگل دیگ بیتگ اَنت۔ آیانی تہ ءَ ھمے ابدلتیپ ءِ ورنائیں بچک سیپ اللہ ءَ ھوار بیتگ۔
آئی ءَ گوشتگ کہ بلوچستان ءَ دردیگیں ویلانی درچ، روچ پہ روچ گیش بوگ ءَ اِنت۔ بلے پاکستان ءِ اھوالکار، انسانی ھکانی پد جنوک ءُ ریاستی ادارہ اے ناگیگیں جاورانی سر ءَ بے توار اَنت ءُ ندارگ چارگ ءَ اَنت۔ اگاں شھریانی کوش میارے گڑا اے ھم یک لس مردمے اَت آ گس ءَ واب ءَ جنگ بیتگ بے تواری پرچا۔ چے پہ ھمے گپ ءَ کہ آ بلوچستان ءِ جاہ منند اِنت یا پمشکا کہ آ توانمند ءُ مزن نامیں کھولے ءِ مردم نہ اِنت۔
سمی دین ءَ گوشتگ کہ ما وھدے زوراکیانی بگیری ءَ توار چست کن ایں گڑا مارا پراکسی ءُ ناشرکاری ءِ نام دیگ بیت۔ چوناھا ما مدام لس مردمانی کوش ایرجتگ آ ریاستی ادارھانی دست ءَ بنت یا درسرکاری ناشرکار، بلے ھما کہ مارا زوراکی ءِ ویلانی ایرجنگ ءِ لوٹ ءَ کن اَنت آ ریاستی ادارھانی نیمگ ءَ بیتگیں انسانی ھکانی پادمالیانی سرءَ پرچا بے توار اَنت۔ آ چی ءَ چہ ریاستی جھگیراں اے میارباری ءِبابت ءَ جست نہ کن اَنت۔ ھما مردم کہ ریاستی ادارھانی اے رستری میارباریانی سر ءَ بے توار اَنت راستی ھمیش اِنت ھمگرنچ اَنت۔ اے اھوالکاری ءِ انسانی ھکانی تھنا یک نیمگی اِنت۔ آ چہ ریاست ءَ ڈن ءِ ناشرکاریاں گند اَنت بلے ریاستی ادارھانی زوراکیانی سر ءَ چمان بند کن اَنت۔
آئی ءَ گوشتگ کہ بی وائی سی ءِ سرءَ پندل ءُ وتسریں گپانی شنگ کنگ ءَ ابید پاکستان ءِ مزنیں رسانکدری ادارھاں لوٹ ایت کہ بلوچستان ءَ بیا اَنت ءُ زمینی راستیانی سر ءَ رپورٹ بہ کن اَنت ءُ بی وائی سی ءِ سر ءَ بھتام ءَ جنگ ءَ اَنت آ ھک ءُ راست اَنت یا نہ ۔ تیوک ءَ ما ھمے ھساب ءَ من ایں کہ شمئے اھوالکاری ءُ ریاست ھمگرنچ نہ اِنت، اگاں نہ بے تواری، ھمگرنچی ءُ زوراکیانی پلہ مرز سرپد بہ ایں۔
