بلوچ یکجھتی کمیٹی ءِ سروک ءُ زور بیگواھیں ڈاکٹر دین مھمد ءِ جنک سمی دین ءَ ماں رسانکدر ءَ وتی شنگ کرتگیں درشانے ءَ گوشتگ کہ ماما کدیر بلوچ اے روچاں کراچی ءَ یک درسرکاری نادراھجاھے ءَ الاج کنگ بوگ ءَ اِنت۔ زوریں بیگواھیانی بگیری ءَ توار چست کنوکیں اے انسان ءَ نہ تیوک ءَ وتی سرجمیں زند گی پہ بلوچ راج ءَ توار چست کنگ ءَ گوازینتگ، بلکیں امر، نادراھی ءُ ریاستی زوراکیانی دیم پہ دیمی کنگ ءَ ابید آئی ارادہ ءُ توکل ءِ تہ ءَ کدی کمی گندگ نہ بیتگ۔
آئی ءَ گوشتگ کہ پانزہ سال ءَ گیش پر ایمنیں جھد کنگ، بزاں ھمک روچ شدکشیں گدان ءَ نندگ یک انچیں منانکے کہ نہ تیوک ءَ گمان کنگ بیت بلکیں ستکے۔ اے دورچاری، دیمونی ءُ مھکمی ھما چیدگ اَنت کہ ماما کدیر ءَ چہ آدگراں نامدار کن اَنت۔
سمی دین ءَ گوشتگ کہ ماما نہ تیوک ءَ اے راج ءِ توار اِنت یک انچیں بے مٹیں ھستی یے کہ آئی سلامتی ءُ زندگی پہ سرجمیں راج ءَ ھژدری اِنت۔ ما درس ھمے دوا ءَ لوٹ ایں کہ ماما زوت جان دراہ بات ءُ وتی اے بے دروریں کاروان ءَ گوں ھمے ارادہ ءُ مھکمی ءَ برجاہ بدار ایت۔
