شال: بلوچ وومن پورم شال ھنکین ءِ ھیلکاری دیوان ھنکین ءِ آرگنائزر ارم بلوچ ءِ سروکیءَ برجم دارگ بوتگ ءُ دیوان ءِ ترانکار شاری بلوچ بوتگ۔ دیون ءَ بلوچ راجدپتر سرھال ءِ سر ءَ شاری بلوچ ءَ تران کرتگ ءُ گوشتگ بلوچ ءِ گوستانک یا بندپتر ءِ بابت ءَ بازیں گوستانک نویسانی ھیال دیم ءَ اتکگ اَنت کہ آیاں بلوچ ءِ گوستانک ءِ بابت ءَ نبشتہ کُرتگ۔ بلوچستان ءِ زمین ءُ آئی ءِ گنجانی سوب ءَ دنیا ءِ دلگوش مدام بلوچستان ءِ نیمگ ءَ گور بوتگ ءُ بلوچ ءِ گوستانک ءِ بابت ءَ بازیں ڈنی گوستانک نویساں وتی جتائیں ھیال دیم ءَ آرتگ اَنت۔
آئی ءَ گوشتگ کہ لھتیں گوستانک نویسانی گوشگ انت بلوچ بلوچستان ءِ جھمنند نہ بیتگ اَنت آ دگہ ھند ءُ دمگاں چہ بلوچستان ءَ اتکگ انت ھنچو کہ برٹش اورنٹلسٹ کہ آئی ءَ بلوچی زبان، بندپتر ءُ شائری ءِ سر ءَ باز پٹ ءُ پول کرتگ آئی ءِ رِد ءَ بلوچ چہ ھلب ءَ اتکگ ءُ اشی ءَ ابید لالا اتو رام یا میجر موکلر چو کہ میجر موکلر ءِ ھم گوشگ اِنت کہ بلوچ چہ ایران ءَ اتکگ اَنت ءُ بلوچ ءِ لھتیں زانتکار گوں اے پرسپکٹواں تپاک ھم کن انت۔
بلے اگاں ما بندپتر ءَ شریں وڑے ءَ بچاریں گڑا مارا ھنچیں ھیال ءُ دلیل دیم ءَ کئیت کہ آیاں چہ زانگ بیت کہ بلوچ بلوچستان ءِ جھمنند بوتگ ءُ مھرگڑ ءِ 11 ہزار سال ءِ گوستانک ءَ چہ پدر بیت ءُ بلوچ ءِ زانتکار ءُ بندپتر نویس ھم اشی ءِ منوک اَنت۔
ءُ ھزاراں سال پیش نبشتہ بوتگیں کتاب “شاھنامہ ” کہ ابولکاسم پردوسی ءَ نبشتہ کرتگ آئی تہ ءَ ھم بلوچ ءِ نام ءُ ذکر ھست اَنت۔
آئی گوشتگ کہ وھدے پانزدھمی کرن ءَ چاکر ھان ءِ دور اتکگ گڑا چاکر ھان 44 کٹمانی الائنس ءِ جوڑ کنت ءُ جنگ کنت ءُ بازیں ھند ءُ دمگانی دستیگ کنت ءُ نندیت واجھی کنت میروانی کلات ءَ دستیگ کنت ءُ آیانی سروکی ءَ کلات ءِ سر ءَ ھلاس کنت۔
اشی ءَ پد ھبدھمی کرن ءَ نوری نسیر ھان ءِ دور کئیت کہ آ دور ءِ رھشون منگ بیت ءُ آئی ءَ سردارانی پارلیمنٹے جوڑ کرتگ ءُ بلوچ کٹم یکجاہ کرتگ انت ءُ اولی رند ءَ شریں رنگے ءَ نزام جنزینتگ ءُ وت ایشانی سروکی کرتگ۔
آئی گوشتگ کہ پد ءَ ھژدھمی کرن ءَ وھدے برتانیہ ایسٹ انڈیا شرکت ءِ نام ءِ سر ءَ ھندوستان ءَ کئیت دستیگ کنت بلوچستان ءَ 1839 ءَ انگریز لشکر ءِ جنرل ولشائر ءِ سروکی ءَ ریاست ءِ بنجاھی شھر کلات ءِ سر ءَ اُرش کنت۔ اے وھد ءَ ھان آپ کلات میر مھراب ھان ءُ ھمراہ دژمنیں لشکر ءَ گوں جنگ کن انت ءُ شھید بنت۔
ترانکار ءَ ھمد ءَ وتی گپ ھلاس کرتگ اَنت ءُ باسکانی جستانی پسوانی دیگ ءَ پد دیوان ءِ ھلاسی ءِ جار جتگ۔
