شال: چه بلوچ یکجھتی کمیٹی ءِ نیمگ ءَ ریاستی زوراکی، بی وائی سی ءِ سروک ءُ کارکنانی دزگیری ءُ زوریں بیگواھیانی بگیری ءَ زھرشانی کنگ بیتگ.
زھرشانی ءَ زوربیگواھیں مردمانی کھولاں ھوار لس مردماں بازیں کچے ءَ بھر زرتگ ، زھرشانی کنوکاں ڈاکٹر ماه رنگ بلوچ، شاه جی بلوچ، بیبرگ بلوچ، بیبو بلوچ، گلزادی بلوچ ءُ آدگه سیاسی بندیگانی درکانودی دزگیری، زوریں بیگواھی ءُ درکانودی کوش ءِ بگیری ءَ اوگام جتگ۔
بی وائی سی ءِ گوشگ اِنت که بلوچستان ءَ ریاست ءِ په بلوچانی توار ءِ دارگ ءَ ابید ھم بلوچ گھگیری کنت، آ وتی شھر ءُ میتگ ءُ چاراه ءَ بلوچ ءِ چکچینی ءِ بگیری ءَ گھگیری جھد ءَ برجاه دار اَنت، ریاست اگاں وتی سرجمیں توان ءَ کارمرز به کنت بلے بلوچ راج ءِ توار ءَ داشت نه کنت۔
بی وائی سی ءَ گوں میان استمان ءُ انسان ھکانی گلاں لوٹ کرتگ ءُ گوشتگ که آ بلوچستان ءَ در انسانی ءُ جنگی میارباریانی ته ءَ ھواریں ریاست ءُ آئی ءِ اداره، لشکر، ایپ سی ، بلوچستان ءِ سرکار ، انتزامیه ، پولیس ، سی ٹی ڈی ، آمیدگس ءُ چیریں ادارھانی بگیری ءَ گامگیج به زیر ایت ءُ په بلوچ ءِ چکچینی ءِ بند کنگ ءَ وتی کرد ءَ پیلو به کنت۔
