بلوچ یکجھتی کمیٹی ءِ جارکش ءَ وتی شنگ کرتگیں درشانے ءَ گوشتگ کہ ما گوریچانی وزیرستان ءَ لس شھریانی گسانی سر ءَ بیتگیں ڈرون ارش ءَ زھگانی ناھکیں کوش، ءُ پشتون چکچینی ءَ گوں ترندیں دانکاں ایر جن ایں۔ پشتون سرڈگار گوستگیں چنچو دھک اِنت کہ ریاستی زوراکیانی آماچ اِنت۔ ما ایشی ءَ یک مھکمیں پشتون چکچینی یے سرپد بہ ایں۔
آئیءَ گوشتگ کہ ھما وڑ ءَ ریاست ءَ بلوچستان ءَ بلوچ راج ءِ بگیری ءَ چکچینی شوندات ءِ سر ءَ کار کرتگ، ھمے پیم ءَ پشتون سرڈگار ءِ سر ءَ ھم ریاستی زوراکیانی درچ برجاہ اِنت۔ مرچی نہ تیوک ءَ بلوچ ءُ پشتون راج ، بلکیں سرجمیں دمگ ءِ نزوریں راج گنتریں ریاستی چکچینی، سیاسی سروکانی زوریں بیگواھی، درکانودی کوش ءُ وتگڑیں لشکرکشی ءِ پارست ءَ برجاھیں زوراکیانی دیم پہ دیمی ءَ کنگ ءَ اَنت۔ لس آبادیانی سر ءَ مارٹر ءِ گولا آس دیگ ءُ ڈرون ارش ھمک روچی دودے جوڑ بیتگ کہ انسانی ھکانی تچک ءَ بگیری اِنت۔
آئی ءَ گوشتگ ما سرپد بہ ایں کہ ریاستی زوراکیانی بگیری ءَ درسیں نزوریں راجاں یکجاہ بوگ ءُ جھد کنگ لوٹ ایت۔ چہ ھمے ھواریں گھگیری ءُ لس مردمانی زور ءَ اے زوراکیانی نزام ءَ پروش دے ایں۔
