پنجگور: بلوچ یکجھتی کمیٹی ءِ سروکانی یل نہ کنگ ءِ بگیری ءَ بی وائی سی ءِ نیمگ ءَ زھرشانی روانکے کشگ بیتگ۔ زھرشانی ءَ جتائیں بھرگاں سیادی داروکیں مردماں ھوار زھگ ءُ جنیناں بازیں کچے ءَ بھر زرتگ۔
زھرشانی کنوکیں مردماں بی وائی سی ءِ سروک ءُ زور بیگواھیں مردمانی اکس دستاں بیتگ اَنت، آیاں پاکستانی لشکر ءِ زوراکی انی دارگ ءُپہ بی وائی سی ءِ سروک ءُ زور بیگواھیں مردمانی یل کنگ ءَ اوگام جتگ۔
اے بابت ءَ بی وائی سی ءِ گوشگ اِنت کہ بلوچ راج ءِ بگیری ءَ ریاستی زوراکی گوں ترندی ءَ برجاہ اَنت، بلے لس مردم ریاستی زوراکیانی دیم ءَ بے توار بوگ ءَ نہ اَنت۔ بلوچ راج پہ وتی مردمانی پھازداری ءُ ریاستی زوراکیانی بگیری ءَ مدام پر ایمنیں جھد کنگ ءَ اِنت۔
آئی ءَ گوں بلوچ راج ءَ لوٹ کرتگ کہ پہ وتی ھکانی پدجنگ ءَ یکجاہ بہ بہ اِت ءُ جھد بہ کن اِت۔ بلوچ راج ءِ دیمونی کدی ھم زوال نہ بنت، اے جھد زوریں بیگواھی ءُآزار دیگ ءُ ایردستی ءِ بگیری ءَ برجاہ بیت۔
