تربت: چه آپسر ءَ زوربیگواه کنگ بیتگیں 22 سالی ئیں ورنا شاه جان کادر داد ءِ کھول ءَ آئی ءِ یل کنگ ءِ لوٹ کرتگ.
شاه جان ءِ کھول ءَ گوں سرکاری ادارہ ءُ انسانی ھکانی گلاں لوٹ کرتگ ءُ گوشتگ که آ زوربیگواھیں شاه جان ءِ یل کنگ ءَ وتی کرد ءَ پیلو به کن اَنت ، شاه جان یک بے میاریں مردمے ءُ چه آئی ءِ زوریں بیگواھی ءَ سرجمیں کھول سسائی آزارانی دیمپان اِنت.
کھول ءَ گوشتگ که اگاں شاه جان ءِ سر ءَ چونیں بھتامے ھست گڑا آمیدگس ءَ پیش کنگ به بیت، اِے وڑ ءَ بے میار ءَ زوربیگواھی انسانی ھکانی پادمالی اِنت۔
چوش که شاه جان ء کادر داد آپسر بنڈ ءِ بازار ءِ جاہ منند اِنت 14 اپریل 2025 ءَ دیگر ءِ وھد ءَ چه یاکوب میتگ ، آپسر ءَ بیگواه کنگ بیتگ ءُ انگت ءَ آئی ءِ بابت ءَ ھچ وڑیں ھال نیست۔
