تربت: چہ نوکیں بھمن ءَ زور بیگواہ کنگ بیتگیں نودربر نئیم بلوچ ءِ یل نہ کنگ ءِ بگیری ءَ کھول ءَ تربت پریس کلب ءَ پریس کانپریس کرتگ ءُ پہ نئیم بلوچ ءِ آجوئی ءَ لوٹ کرتگ۔
آئی ءَ گوشتگ کہ نئیم بشیر دوازدہ تبک ءِ نودربر ے 5پروری 2025 ءَ چہ گس ءَ آوار جنگ بیتگ ۔ آ یک ایمنیں شھری یے ءُ وانندگیں ورنایے اے وھد ءَ آئی چکاس ھم برجاہ اِنت آئی ءَ بھر زرت نہ کرتگ آئی وانگ زوال بوگ ءِ اِنت۔
آئی ءَ گوشتگ کہ نئیم وتی مات ءُ پت ءِ یکیں بچک اِنت چہ آئی زوریں بیگواھی ءَ سرجمیں کھول سکا جنجالانی دیمپان اِنت۔ بندات ءَ دمگ ءِ انتزامیہ ءَ دو سے روچ ءِ تہ ءَآئی یل کنگ ءِ دلجمی داتگ، بلے انوں سے ماہ گوستگ بلے نئیم ءِ ھچ وڑیں ھال نیست۔
کھول ءِ گوشگ اِنت کہ ما کانود ءِ رد ءَ وتی لوٹاں ایر کنگ ءَ ایں، اگاں پہ مئے لوٹاں گوں سنگینی ءَ گامگیج زورگ نہ بوت گڑا ما لاچار ایں کہ زھرشانی بہ کن ایں۔
نئیم بلوچ ءِ کھول ءَ گوں بلوچستان سرکار، دمگی واکدار ءُ انسانی ھکانی ادارھانی گون ءَ لوٹ کرتگ کہ پہ نئیم بلوچ ءِ آجوئی ءَ وتی کرد ءَ پیلو بہ کن اِت۔
