کراچی: بلوچ یکجھتی کمیٹی ءِ نیمگ ءَ بلوچ چکچینی ءِ بگیری ءُ اسلام آباد ءَ برجاھیں زھرشانی نندانک ءِ پلہ مرزی ءَ زھرشانی روانک چہ لیاری ءَ درکپتگ ءُ ھشت راہ ءَ روگ ءَ بوتگ کہ کراچی پولیس ءَ میران ناکہ ءَ داشتگ اَنت۔
زھرشانی روانک ءَ بلوچ یکجھتی کمیٹی ءِ کارکن، زور بیگواھیں مردمانی کھول، نودربر، زھگ ءُ جنین، سیاسی، چاگردی ءُ مردمی ھکانی کارکن ءُ جتائیں بھرگاں سیادی داروکیں مردماں بازیں کچے ءَ بھر زرتگ۔
زھرشانی کنوکیں مردماں زور بیگواھیں مردمانی اکس، بینر ءُ پلے کارڈ دستاں بوتگ اَنت ءُ آیاں بلوچ چکچینی ءِ بگیری ءُ اسلام آباد ءَ برجاھیں نندانک ءِ پلہ مرزی ءَ اوگام جتگ۔
زھرشانی کنوکیں مردمانی گوشگ اِنت کہ مئے روانک پرایمن اِنت اگاں مارا کراچی پولیس داں ھشت راہ ءَ روگ ءَ نیل ایت گڑا ما ھمد ءَ میران ناکہ ءَ زھرشانی ءَ برجاہ دار ایں۔
