لندن : پہ بلوچستان ءِ چیردستیں مردماں توار چست کنگ ءَ بلوچ نیشنل موومنٹ ( بی این ایم ) ءَ ماں برتانیا ءِ راجمستری ءِ بنجاہ ءَ لابی گری مراگشے برجم داشتگ۔ اے مراگش برتانیا ءِ پارلیمانی باسک جان میکڈونل ءِ کمک ءَ جوبلی روم ءَ بیتگ ، ایشی ءِ تہ ءَ گل ءِ سرکماش ڈاکٹر نسیم ءِ سروگانی ءَ بی این ایم ءِ باسکاں بھر زرتگ۔
ماں اے نیاد ءَ بی این ایم ءَ زور بیگواھی ’’ کشگ ءُ چگل دیگ ‘‘ ءِ شوندات ، ناراھیں دزگیری ءُ سیاسی بگیریانی برپشت ءَ مردمانی سر ءَ بیڑ برگ رنگیں مزنیں جیڑھانی سر ءَ دلگوش گْْور کنائینتگ۔گچینی بلوچ یکجھتی پتر ( بی وائی سی ) ءُ دگہ سیاسی باسکانی سر ءَ برجاھیں ریاستی زوراکی سھرا کنگ بیتگ اَنت۔
بلوچستان ءِ جیڑہ ءِ سر ءَ دلگوش ءُ پلہ مرزی ودی کنگ ءِ مول ءِ پد ءَ بیتگیں اے مراگش ءَ بلوچ شھمیرانی کھول ءُ زور بیگواہ بیتگیں مردماں ھم بھر زرتگ ءُ وتی درد ءُ رنج درشانتگ اَنت۔چہ زور بیگواھی ءَ پد یلہ بیتگیں مردماں ماں پاکستان ءِ چیریں آزار جاھاں وتی سر ءَ گْوستگیں آزار ءُ ناروائیں کارانی سر ءَ گپ جتگ۔
مراگش ءَ گوں برتانیا ءِ پارلیمان ءِ باسک ءُ آیانی ھمراھاں بلوچستان ءِ سیاسی جیڑہ ءُ آئی ءِ نہ گیش اتگیں بستار ءِ سر ءَ ھم گپ بیتگ۔ پارلیمان ءِ باز باسکاں اے مراگش ءَ بھر زرتگ ءُ لھتے ءَ پہ یکجھتی ءَ وتی جھگیر دیم داتگ اَنت۔
بی این ایم ءِ باسکاں چہ مراگش ءَ پیش گوں پارلیمان ءِ باسکاں راھوت کرتگ داں سیاسی تک ءَ گیش ءَ گیش مردم بھر بہ زیر ایت ءُ پلہ مرزی بہ کنت۔
بی این ایم ءِ جارکش ءَ گْوشتگ اے سپارتی کوشست اے رد ءَ جْوانیں گامگیجے اَت کہ بلوچ راجی زْرمبشت میان استمانی تک ءَ سھرا بہ بیت ، ھمے مراگش ءَ میان راج ءِ دیم ءَ اے گپ ایر کنگ بیتگ کہ آ ماں بلوچستان ءَ مردمی ھکانی بگیریانی دارگ ءَ سانمندیں کارروائی بہ کن اَنت۔
