برسلز انسانی ھکانی میان استمانی ادارہ پروٹیکٹ ڈیپنڈرز یورپی یونین ءَ بلوچستان ءَ جنین، انسانی ھکانی کارکن، وکیل ءُ چاگردی سروکانی دزگیری ءُ آیانی ترسینگ ءِ سر ءَ بژن درشان کرتگ۔
ادارہ ءَ بلوچ یکجھتی کمیٹی ءِ سروک، سیاسی ءُ انسانی ھکانی کارکن ڈاکٹر ماہ رنگ بلوچ ءِ ناگیگیں جاورانی سر ءَ بژن درشان کرتگ کہ آ 22 مارچ 2025 ءَ پولیس ءَ دزگیر کرتگ۔
گل ءِ گوشگ انت کہ ڈاکٹر ماہ رنگ بلوچ یک نامداریں انسانی ھکانی کارکن ءُ بلوچ یکجھتی کمیٹیءِ سروک اِنت ءُ آئی بلوچستان ءَ ریاستی زوراکی ، زوریں بیگواھی ءُدرکانودی کوش ءِ بگیری ءَ توار چست کرتگ۔ آ 22 مارچ ءَ چہ شال ءَ پر ایمنیں زھرشانی یےءَ دزگیر کنگ بیتگ۔
گل ءَ گوشتگ کہ آیانی اے زھرشانی نندانک شال ءَ پولیس ءَ زھرشانی کنوکانی سر ءَ بیڑ برتگ ءُ آزار داتگ اَنت، سے مردم کشگ، باز مردم ٹپی بیتگ ءُ پہ بلوچ سیاسی کارکنانی دزگیری ءِ بگیری ءَ برجم دارگ بیتگ اَت۔ ڈاکٹر ماہ رنگ بلوچ ءِ دزگیری آیانی زوراکیانی بگیری ءَ توار چست کنگ ءِ سزا اِنت۔
آئی ءَ گوشتگ کہ سبیہ بلوچ ءِ 5اپریل 2025 ءَ ناھک ءَ دزگیر کنگ ءِ جھدکنگ بیتگ ءُ نوں آئی کھول ءَ نشانگ کنگ ءَ اَنت کہ اے آئی انسانی ھکانی جھد ءِ بیرگیری اِنت۔
گل ءَ گوشتگ کہ ھمے روچ ءَ دگہ یک بلوچ جنینے کارکنے گلزادی بلوچ ھم آزار دیگ ءِ ھواری ءَ دزگیر کنگ بیتگ کہ آ اے وھد ءَ ھدہ زندان ءَ تھری ایم پی او ءِ پارست ءَ بندیگ اِنت ءُ آئی مانزمانی ھم بوگ ءَ نہ اِنت۔ آئی ءِ جاور ناگیگ اَنت بلے چہ درمان ءَ ھم زبھر اِنت ءُ پہ آئی زندگی ءَ ترس اِنت۔
ادارہ ءَ نامداریں انسانی ھکانی وکیل ایمان زینب مزاری ءُ آئی جود ایڈوکیٹ ھادی الی چھٹہ ءِ بگیری ءَ آمیدگسی زوراکی ءِ سر ءَ بژن درشان کرتگ کہ اے دوئیں وکیل اَنت زوریں بیگواھی ، درکانودی کوش ءُ ریاستی زوراکیانی بگیری ءَ سانمندیں کھولانی کمک ءَ بیتگ اَنت۔
