بلوچ وومن پورم ءَ وتی شنگ کرتگیں درشانے ءَ گوشتگ کہ بلوچ وومن پورم کیچ ھنکین ءِ آرگنائزنگ باڈی دیوان بُنجاھی آرگنائزر ڈاکٹر شلی بلوچ ءِ سروکی ءَ برجم دارگ بیتگ، دیوان ءِ گچینی مھمان بنجاھی پترءِ باسک شھناز بلوچ بیتگ۔ دیوان ءِ بُن گپ بنجاھی سرکولر ، گل ءِکار، نگد کاری ، ھندی ءُ میان اُستمانی سیاسی جاور ءُ آؤکیں گامگیج بیتگ اَنت۔
دیوان ءِ بندات چہ پجاری نشست ءَ بیتگ ءُ پدا بنجاھی سنگت ءَ بنجاھی سرکولر ونتگ ءُ بازیں باوست ءَ پد گل ءِ کار ءِ سر ءَ آیاں تران کنان ءَ گوشتگ کہ ما یک زالبول گلے ءَ گوں بندوک ایں ءُ راجدوستی ءِ بُنیاد ءَ لس بلوچ زالبولءَ بی ڈبلیو ایپ ءِ پتر ءَ یکجاہ کنگ ءُ آیانی سیاسی ھیلکاری کنگ مئے اولی زمہ واری اِنت، بلوچستان ءِ کنڈ کنڈ ءَ گوں بلوچ زالبولاں استانی زوراکی ءُ چاگردی سیلکاری ءِ بگیریءَ ھیل دیگ ءُ پہ ھمک ترندیں جاوراں ساڑی کنگ۔
مئے جھد تھنا فیمنزم ءِ سٹریکچر ءِ تہ ءَ نہ اِنت بلکیں چہ پیور بلوچ نیشنلزم ءِ بنیاد ءَ بوگ ءَ اِنت بلوچ کہ مرچی ھست اَنت آ زالبول بنت یا کہ مردین بنت یکیں ھساب ءَ بلوچ ج جھد ءِ تہ ءَ کربانی دیگ ءَ اَنت ءُ اے جھد ءِ بھر اَنت۔
آئی ءَ گوشتگ کہ وھدیکہ پہ زرمبشتانی دارگ ءَ زوراکی کنگ بیت اودا پہ مردیناں سرپیس ءَ کار کنگ باز گران بیت گڑا زالبول لیڈنگ پوزیشن ءَ کئیت ءُ چیزاں لیڈ کنت،ھمے رنگ ءَ اگاں ما بچاریں ھندوستان ءِ سر ءَ وھدیکہ برتانیہ زورگپت بیت گڑا اودا پہ مردیناں کار کنگ گران بیت گڑا آ انڈر گراؤنڈ بنت ءُ زالبول دیم ءَ کاینت لیڈ کن اَنت، گڑا برتانیہ ءِ ھوم سیکٹری گُو ش ایت من ءَ ھچ چیز ءَ اینچو پریشان نہ کُتگ بلئے زالبولانی اے کچ ءَ درآھگ ءُ زانشت ءِ بنیاد ءَ جھد ءِ بھر بوگ ءَ من ءَ سک نہ گیگ کرتگ، الم اِنت زالبولانی اے کچ ءَ ڈن ءَ درآھگ یک سپونٹینئیس چیزے نہ اِنت بلکیں ھما زوراکی ءِ درچ اِنت ءُ آیانی سر ءَ کار کنگ بیتگ ءُ آپہ ہر پیمیں جاوراں تیار کنگ بیتگ اَنت، گڑا ھمے رنگ ءَ وھدیکہ ما مرچی بلوچستان ءِ گراؤنڈ ءَ بہ چاریں جار ءُ بے جار ءَ مردینانی سْیاست ءِ سر ءَ پابندی جنگ بیتگ ءُ بلوچ زانتکارانی مزنیں لڑے ریاستی زندانی تہ ءَ بندیگ اِنت گڑا بلوچ زالبول لیڈنگ پوزیشن ءَ کاینت ، بلے یک چیزے زانگی اِنت کہ پہ زوراک ءِ مرد ءُ جنین پرک نہ کنت، آ مرد ءُ جنین نہ کنت آ بلوچ کنت ءُ نشانگ کنت گڑا بلوچ زالبول ھم زندانی کنگ بیتگ اَنت ءُ بوگ اَنت ،مھرنگ بلوچ ، بیبو بلوچ ءُ گلزادی بلوچ کہ مروچی زندانی اَنت ءُ وڑ وڑیں آزار سگگ ءَ اَنت، چیز ہر وھد ءَ یک ھساب نہ بنت پہ ھمے ترندیں جاوراں مارا لس بلوچ ءَ ھوار بلوچ زالبول ساڑی کنگی اَنت دانکہ آ راجی جھد ءَ وتی کرد ءَ پیلو کُت بہ کن اَنت ، بانڈی ، ھاتون بی بی ءُ کریمہ ءِ کسّہ ءَ نوک بہ کنت۔
آئی ءَ گوشتگ کہ کیچ چئیرمین گلام مھمد ، کمبر ءُ کریمہ ءِ ھنکین اِنت اے ھنکین ءَ ہر دور ءُ باریگ ءَ راجی سر داتگ ءُ مُدام زوراک ءِ گوما جنگ کنان بیتگ اَنت ءُ پہ وتی تنگوئیں سرانی دیگ ءَ ھچبر چک ءُ پد نہ بیتگ اَنت بلکیں گھگیری ءِ چیدگ جوڑ بیتگ اَنت ءُ راجدپترءِ تاکانی تہ ءَ نمیران اَنت۔بی ڈبلیو ایپ ءِ زمہ واری اِنت کہ آ لس بلوچ زالبولانی ھیلکاری ءَ بہ کنت دانکہ آ پہ وتی راجی سْیتانی پھازگ ءَ ھچ بر چک ءُ پد مہ بنت ءُ پگری پارست ءَ کاراں دیم ءَ بران بہ کناں ءُ ریاستی ھچ وڑیں پندالانی آماچ مہ بنت۔
آؤکیں گام گیج ءِ تہ ءَ بلوچ وومن پورم کیچ ھنکین ءِ آرگنائزنگ باڈی جوڑ کنگ بیتگ سابرہ بلوچ ھنکین ءِ آرگنائزنگ، ھوا بلوچ ڈپٹی آرگنائزر ، ماہ گنج بلوچ ، گلشن بلوچ ءُ بسما بلوچ آارگنائزنگ ءِ باسک گچین کنگ بیتگ اَنت۔
