بلوچ نیشنل موومنٹ ءِ سر کماش ڈاکٹر نسیم بلوچ ءَ ماں چاگردی رسانکدر ایکس ءَ وتی شنگ کرتگیں درشانے ءَ گوستگیں روچ ءَ ھندوستان ءِ سیمسر کشمیر ءَ بیتگیں ناشرکاری اُرش ایر جتگ ءُ گوشتگ که اِے اُرش ءَ 25 ءَ گیش بے میاریں مردم بیران بیتگ۔
آئی ءَ گوشتگ که سواد ءَ اتکگیں مساپرانی نشانگ کنگ لگوری کار ے ءُ ایشی مول ھند ءِ ته ءَ ترس ءِ ودی کنگ ءُ یکمشتی ءُ تپاکی ءِ ھراب کنگ اِنت.
ڈاکٹر نسیم بکوچ ءَ گوشتگ که اِے وھد ءَ گیش جیڑگ لوٹ ایت، اِے کوش چه پاکستانی لشکر ءِ سروک آسم منیر ءِ کوھنیں ءُ اَڑاند ودی کنوکیں ” دو راجی لیکه ” ءِ درشان ءَ پد کنگ بیتگ که اے انچیں لیکھے گوستانک ءِ رد ءَ ناشرکاری ، کینگ ءُ سیمسری جیڑھ گیش کرتگ۔
آئی ءَ گوشتگ که اِے یک انچائیں ویلے نه اِنت بلکیں یک درورے، ھر وھد که پاکستان کشمیر ءِ جیڑھ ءَ زبانی یا چیدگی دروشم ءَ چست کنت گڑاڈگار ءِ سر ءَ کشت ءُ کوش گندگ بیت۔ جھان ءَ اِے پیسر ءَ ھم دیستگ که کشمیر ءَ پاکستانی شھری دزگیر یا کشگ بنت، ایران داں اوگانستان ءُ بلوچستان ءِ سیمسراں ھم ناشرکاری ءِ نشان گندگ بنت۔
ڈاکٹر نسیم بلوچ ءَ گوشتگ که پاکستان ءِ لشکری اداره ناشرکاری ءَ په وتی دری شونداتانی کمک ءَ کارمرز کن اَنت که اِے کار دمگ ءِ ایمنی ءَ نزور کن اَنت۔
ڈاکٹر نسیم بلوچ ءَ درشان ءِ گڈی ءَ گوشتگ که ما گوں اِے اُرش ءَ سانمندیں مردم ءُ کشمیر ءِ لس مھلوک ءَ اوشتاتگ اِیں، اِے اُرش بائد اِنت که میان استمان ءِ نیمگ ءَ ایر جنگ به بیت ءُ پاکستان په ناشرکاری ءِ یکشلیں سروکی ءَ جست گرگ به بیت۔
