بلوچ یکجھتی کمیٹی ءِ سروک سمی دین ءَ ماں رسانکدر ءَ وتی شنگ کرتگیں درشانےءَ گوشتگ کہ مرچی ڈاکٹر ماہ رنگ بلوچ ءُ بیبو بلوچءِ درکانودی بندیگ کنگ 3 ایم پی او ءِ پارست ءَ سی روچ گیش کنگ بیتگ۔
آئی ءَ گوشتگ کہ ڈاکٹر ماہ رنگ ءِ کھول ءُ آئی ھمبل گوستگیں چنچو ھپتگ اِنت کہ ھمک کانود ءِ دروازگ ءَ ٹکگ ءَاَنت، راھبند ءِھساب ءَ ھمک پورم ءَ توار چست کنگ ءَ اَنت، بلے ھمک جاہ ءَ بے اوست، بے توار ءُ نادزرس بوگ ءَ اَنت۔ آمیدگس ءَ وتی چم بند کرتگ اَنت، انساپ ءِ نزام ءَ وتی دیم ترینتگ ءُ ریاستی ادارہ انساپ دیگ ءَ اَبید مارا ھمے پیش دارگ ءَ اَنت کہ ما اے ڈیھ ءِ شھری نہ ایں۔
سمی دین ءَ گوشتگ کہ پر ایمنیں سیاسی تواراں زندانی کنگ ءُ ریاست ھمے پیش دارگ ءَ اِنت کہ اد ءَ ایمنیں جھد ءَ گنجاھشت نیست، اد ءَ درور ءِ جاہ ءَ زور کارمرز کنگ ءُ ھک ءِ جاہ ءَ زوراکی کنگ بیت۔
آئی ءَ گوشتگ کہ وھدے راھبند ءِ راہ بند کنگ ءُ کانود زوراکی ءَ کمک بہ کنت، گڑا ریاست وت چہ لس مردمانی دلانی تہ ءَ پر ایمنیں جھد ءِ بیسہ ھلاس کنت ۔ شما یکشل ءَ انساپ ءِ دروازگ ءَ بند کن اِت گڑا لس مردمان ءَ ھمے پیش دار اِت کہ سیاسی ءُ پر ایمنیں جھد دروگ اَنت۔ وھدے کہ چہ پر ایمنیں جھد ءَ مردمانی بیسہ ھلاس بوت گڑا تھنا جاہ بس زھر، بے تاھیری ءُ بگیری ءِ پشت کپ ایت۔
سمی دین ءَ گوشتگ کہ بلوچستان ءِ جیڑہ یک سیاسی جیڑھے ءُ اے سیاست ءِ پارست ءَ گوں گپ ءُ تران ءَ گیش ءُ گیوار کنگ بیت۔ بلے اگاں سیاسی جھدکار زندانی کنگ بہ بنت گڑا اے پر ایمنیں راھانی بند کنگ زانگ بیت۔ گڑا ھمیش اِنت کہ شما پر ایمنیں جھد ءِ در ءَ بند کن اِت گڑا لس مردمانی دیم ءَ کجام نیمگ ءَ دے اِت۔
