کیچ: مند ءَ بلوچ سرمچارانی نیمگ ءَ پاکستانی لشکر ءِ چوکی ءِ سر ءَ بیتگیں اُرش ءَ سے کارمندانی مرگ ءُ شش کارمند ءِ ٹپی بوگ ءِ گپ سرکار ءَ راست کرتگ۔
اُرش ءَ مرتگیں کارمندانی نام لکمیر، رانا زاھد ءُ گل سنت اِنت کہ چہ ٹپی بیتگیں کارمنداں دو ءِ جاور ناگیگ اَنت۔ ارش کنوکاں درسیں سلاہ ءُ سامان برتگ اَنت۔
چہ آدگہ بنشونانی رد ءَ اُرش ءِ آسر ءَ پاکستانی لشکر ءِ مرتگیں کارمندانی کچ گیشتر اِنت، سلاہ بندیں مردماں کوہ ءِ سر ءَ برجاھیں چوکی سرجم ءَ دستیگ کرتگ ءُ پہ کمک ءَ اتکگیں پاکستانی لشکر ءِ کارمند نشانگ کرتگ اَنت۔
چوش کہ دوشی چہ مند ءَ اَبید مشکے ءَ یک جاھے ءَ پاکستانی لشکر ءِ سر ءَ اُرش کنگ بیتگ ءُ سے جاہ ءَ لیویز چوکیانی سر ءَ اُرش کنگ ءُ سلاہ برگ بیتگ اَنت۔
ھمے وڑ ءَ کلات ءَ ھم سلاہ بندیں مردماں لیویز چوکی ءِ سر ءَ اُرش کرتگ دو لیویز کارمند مرتگ ءُ دو ٹپی بیتگ۔
اے ارشانی زمہ واری انگت ءَ ھچ گل ءَ نہ زرتگ۔
