بلوچستان لبریشن پرنٹ ( بی ایل ایپ ) ءِ جارکش میجر گھرام بلوچ ءَ ماں رسانکدر ءَ وتی شنگ کرتگیں درشانے ءَ گوشتگ که بی ایل ایپ ءِ سرمچاراں پنجگور ءُ گومازی ءَ زورگریں پاکستانی لشکر دو جتائیں اُرشاں نشانگ کرتگ ءُ جانی ءُ مالی تاوان داتگ ھمے وڑ ءَ مند ءَ پولیس تھانه ءِ سر ءَ اُرش کرتگ ءُ سرجمیں سلاه پل اِتگ اَنت۔
آئی ءَ گوشتگ که مرچی 21 پروری 2025 ءِ نیمروچ ءِ دوازده ءَ بی ایل ایپ ءِ انٹیلیجنس ٹیم ءَ ھال داتگ که چه لشکری سروکانی نیمگ ءَ پنجگور ءِ مزنیں بنجل، چتکان ءَ یک مزنیں نیادے برجاه اِنت. سرمچاراں انٹیلیجنس ٹیم ءِ ھال ءِ رد ءَ کاروائی کرتگ ءُ مزنیں بنجل ءِ سر ءَ اُرش کرتگ. اُرش ءِ وھد ءَ لشکر ءِ مزنیں لشکری سروگان نیاد ءَ ساڑی بیتگ اَنت که آ سھب ءِ ادار ھشت ءَ گوں ھیلی کاپٹراں بنجل ءَ اتکگ اَنت.
جارکش ءَ گوشتگ که سرمچاراں ٹوھیں سلاه کارمرز کرتگ اَنت ءُ چتکان ءَ لشکر ءِ مزنیں بنجل نشانگ کرتگ ءُ جانی ءُ مالی تاوان داتگ. اُرش ءَ پد زورگریں لشکر ءَ ھمے ھند ءَ دگ بستگ اَنت ءُ پٹ ءُ پول بندات کرتگ بلے بلوچ سرمچار اُرش ءَ پد په سلامتی وتی مھکمیں بندراں سر بیتگ اَنت۔
آئی ءَ گوشتگ که دگه یک کاروائی یے ءَ 19 اپریل 2025 ءَ شپ ءِ ھشت ءُ نیم ءَ بی ایل ایپ ءِ سرمچاراں کیچ ءِ ھند مند ءِ گریڈ بازار ءَ پولیس تانه ءِ سر ءَ اُرش کرتگ. سرمچاراں پولیس کارمند دزگیر کرتگ اَنت ءُ تانه ءَ سلاه ءُ آدگه سامان زرتگ ءُ گوں وت برتگ اَنت. بلے بلوچ بوگ ءُ مردمگری ءِ بنیاد ءَ سرمچاراں پولیس کارمنداں ھچ وڑ ءَ جانی تاوان نه داتگ.
جارکش ءَ گوشتگ که دگه یک اُرشے ءَ سرمچاراں 19 اپریل ءِ شپ ءِ نو ءِ نزیک ءَ تمپ ءِ ھند گومازی ءَ کپٹن جھانگیر ءِ گس ءَ زورگریں لشکر ءِ برجاھیں چوکی ءِ سر ءَ بازیں گرنیڈ لانچر گولا آس داتگ که آ نشانگ ءَ لگ اِتگ اَنت، اُرش ءِ آسر ءَ زورگریں لشکر ءَ جانی ءُ مالی تاوان بیتگ.
میجر گھرام بلوچ ءَ اُرشانی زمه واری من اِتگ ءُ گوشتگ که داں بلوچستان ءِ آجوئی ءَ زورگریں لشکر ءِ نشاگ کنگ ءِ کول ءَ کن اِیں.
