بلوچستان لبریشن پرنٹ ( بی ایل ایپ ) ءِ جارکش میجر گھرام بلوچ ءَ ماں رسانکدر ءَ وتی شنگ کرتگیں درشانے ءَ گوشتگ کہ استاد نیک مھمد پنام واھگ ء آدم کلی آواران ءِ جاہ منند اِنت کہ دژمن ءِ چیریں واکاں گوں ھمگرنچیں ناشرکاراں 18 پروری 2022 ءَ شھید کرتگ۔ چہ بازیں سوب ءُ جیڑھانی رد ءَ گل ءَ آئی شھیدی ءِ ھال داشتگ۔
آئی ءَ گوشتگ کہ شھید استاد نیک مھمد پنام واھگ 2012 ءِ گڈی وھد ءَ پہ بلوچ راجی آجوئی جھد ءَ بی ایل ایپ ءِ راھبند گچین کرتگ ءُ داں گڈی دمان ءَ گوں ھمے جھد ءَ ھمگرنچ بیتگ۔
جارکش ءَ گوشتگ کہ شھید نیک مھمد بی ایل ایپ ءِ راھبند ءَ بازیں جنگاں ھوار بیتگ ءُ گوں جوانمردی ءُ نہ ترسی ءَ زورگریں دژمنیں لشکر ءِ بگیری ءَ مڑگ ءَ بیتگ۔
آئی ءَ گوشتگ کہ 2015 ءَ زورگریں پاکستانی لشکر ءَ آئی گس گوں تراکناکیں شورھاں تباہ کرتگ ءُ کھول پہ زور کَشّگ ءُ باھوٹی زند گوازینگ ءَ لاچار بیتگ۔ انگت ءَ نیک مھمد گوں درسیں جنجالاں دژمن ءِ دیم ءَ سرجھل کنگ ءَ ابید مھکم بیتگ ءُ پہ آجوئی ءَ گوں گل ءُ زرمبشت ءَ وتی ھمگرنچی مھکم داشتگ۔
میجر گھرام ءَ گوشتگ کہ بی ایل ایپ شھید نیک مھمد ءَ آئی گرانبھائیں دیمونیانی سر ءَ ستک شانی ندر کنت ءُ وتی راج ءَ سدکی دنت کہ بلوچستان ءَ ھمک شھید ءِ ھون ءِ بیر بلوچستان ءِ آجوئی ءُ وشھالی ءِ دروشم ءَ گرگ بیت۔
