شال: بلوچ یکجھتی کمیٹی ءِ سروک ڈاکٹر ماه رنگ بلوچ ءِ گھار نادیه بلوچ ءَ ماں چاگر ی رسانکدر ایکس ءَ وتی شنگ کرتگیں کلوھے ءَ گوشتگ که من گوں سرجمیں مردماں لوٹ کن آں که ردیں ھالانی شنگ مکن اَنت ءُ درگانی سر ءَ باور مکن اَنت، ڈاکٹر ماه رنگ بلوچ انگت ءَ یک کنگ نه بیتگ، اگاں ھر وھد آجو بیت من وت شمارا سرپد کن آں۔
آئی ءَ گوشتگ که سوگند ءِ بابت ءَ انگت ءَ بازیں گپ ءُ باوست برجاه اِنت، دلجم به اِت که ڈاکٹر ماه رنگ ءِ وکیل ءُ کانودی ٹولی آئی ءِ کانودی جاورانی بابت ءَ سرجم ءَ سرپد اَنت ءُ گوں رپک ءُ کار زانتی ءَ ایشی سر ءَ کار ءَ اَنت۔
نادیه بلوچ ءَ گوشتگ که ما چه شمئے پریشانی ، پله مرزی ءُگپانی منت وار آں من گوں شما لوٹ کن آں که اے جیڑھ ءَ گوں سیاسی باوست ءَ مٹ مکن اِت ، اِے کانودی ءُ مزنیں جیڑھے ما چہ ایشی ءَ سرپد اِیں ، شمئے یکشلیں کمک باز ارشت دار ایت۔
