پسنی : گوستگیں روچاں بیگواہ کنگ ءُ پدا کشگ ءُ دور دیگ بیتگیں کسانسالیں ساھل ءِ ناھکیں کوش ءِ بگیری ءَ زھرشانی کنگ بیتگ۔
زھرشانی ءَ زھگ ءُ جنیناں ھوار بازیں کچے ءَ مردماں بھر زرتگ، زھرشانی کنوکاں ساھل ءِ کشندھانی دزگیر کنگ ءُ آئی ءِ کھول ءَ انساپ دیگ ءِ لوٹ کرتگ ءُ گوشتگ کہ ” ھپتگے بیت کہ ما ساھل ءِ ناھکیں کوش ءِ بگیری ءَ زھرشانی کنگ ءَ ایں بلے انگت چه پسنی پولیس ءِ نیمگ ءَ پہ ساھل ءِ کشندھانی بابت ءَ دلجمیں گامگیج زورگ بوگ ءَ نه انت۔”
آیانی گوشگ اِنت دانکہ پسنی پولیس مٹ کنگ مہ بیت ءُ دگہ زمہ واریں پولیس کارمند آرگ مہ بیت ،اے وئیل ءِ بارہ ءَ پٹ ءُ پول بندات کنگ نه بیت، پسنی ءِ جاور ھمیش بنت۔
زھرشانی کنوکاں لوٹ کرتگ کہ” په پسنی ءِ جاورانی گیش ءُ گیوار کنگ ءُ پہ مردمانی ایمنی ءِ چار ءُ گزار کنگ ءَ سلاہ بندیں ٹولی دزگیر کنگ به بنت ءُ دگہ زمہ واریں ایس ایچ او ءُ ڈی ایس پی یے آرگ به بیت، چوش کہ ھپتگے گوستگ بلے انگت ءَ چہ پسنی پولیس ءِ نیمگ ءَ ھچ وڑیں گامگیج زورگ نہ بیتگ۔
