بلوچ یکجھتی کمیٹی ءِ سروک ڈاکٹر سبیہ بلوچ ءَ ماں رسانکدر ءَ وتی شنگ کرتگیں درشانے ءَ گوشتگ که ما وھدے که پہ راجی مچی ءِ جار جتگ اَت ریاست ءَ وتی زوراکی بندات کرت. ھمک وھد ءَ مارا ءُ مئے مردمان ءُ سرجمیں جھان ءَ ھمے باور کنگ ءِ جھد کنگ بیتگ کہ پلاں جاہ ءِ مچی جیڑینگ بیتگ ءُ ریاستی ادارھانی تیرگواری ءِ آسر ءَ باز مردم ٹپی یا کشگ بیتگ اَنت. ما باز بر ءَ جھد کرتگ که مردم زھر مه گر اَنت، ما ھما وھد ءَ زانتگ ءُ انگت ءَ زانگ ءَ ایں کہ مردم زھر گرگ ءَ نہ اَنت۔
آئی ءَ گوشتگ که ریاست ءَ کُشگی بیتگ په ایشی ءَ آئی ءَ دروگیں نیمونے کرتگ، بلے مرچی ھمک مردم سرپد بیتگ که گپ زھر گرگ ءِ نه بیتگ ، وڈ ءِ جیڑہ ھم مردمانی زھر گرگ نه بیتگ ، گپ ھمک وھد ءَ زور ءِ تونگری لشکری پگر اِنت که چه اکبرھان ءَ پیسر ءُ رند ءَ ھم بیتگ ءُ مارا دلوت سرپد بنت۔ آئی نزّ ءَ مئے ھون ءَ بستار نیست ، چی ءَ که ما زورگپت اِیں ءُ زوراکی ءِ ساھگ ءَ انسان ءِ ساه ءَ ھم بستار نیست.
ڈاکٹر سبیہ ءَ گوشتگ که زور ءِ تونگری مدام توانمنداں بیتگ ، بلے گوں کجام روشتاں پیش بیتگ اَنت آ چہ درساں گنتر اِنت، په سیاسی مردمانی دارگ ءَ آیاں بلیک میل کنگ ءَ اَنت، منی پت بشیر اھمد پہ منی دارگ ءَ آوار جتگ ءُ چه ھما روچ ءَ آئی ءِ ھچ وڑیں ھال نیست.
آئی ءَ گوشتگ که مرچی وڈ ءَ ھوار سرجمیں بلوچستان ءِ مردمانی ھون ءِ پیسلہ ءَ ایپ سی ءِ یک سپاھی یے کنگ اِنت ، ھر جاه که آ بہ لوٹ ایت تیرگواری کنت۔
ڈاکٹر سبیہ بلوچ ءَ گوشتگ کہ منی وڈ ءِ جاہ منندیں بلوچ پسگاں شما ءُ سرجمیں بلوچستان دیمونی دیگ ءَ اِنت، گوستانک آیاں گوں جْوانیں دانکاں نبیس ایت۔ گھگیری یک نوکیں بانداتے کار ایت، ھمے گھگیری سرجمیں بلوچستان ءَ زندگ دارگی اِنت۔
