بلوچ راجی زْرمبشت ( بی این ایم ) ءِ شھید راشد مشکے آواران ھنکین ءَ برجاہ دارگ بیتگیں مچی ءَ تْران کنان گْوشتانک دیوکاں گْوشتگ بلوچ راج گْوستانک ءِ ھمک باریگ ءَ جنگی جاورانی تہ ءَ بیتگ۔مدام دری واکاں پہ بلوچستان ءِ دستیگ کنگ ءَ بیڑ آؤرتگ ءُ بلوچ راج دائم آیانی بگیری ءَ گھگیری کنگ ءَ اِنت۔
گوں مچی ءَ بی این ایم ءِ گھبودی کارگشاد ماسٹر اکبال ، بی این ایم مشکے آواران ھنکین ءِ سرکماش استاد مھران ءُ گْوستگیں چارگزار رپیک ءَ تْران کرتگ ، جارچین ھنکین ءِ کمک سرکماش تلار ءَ اَت۔
تْرانکاراں گْوشتگ بلوچ راج ءَ 77 سال اِنت پہ وتی آجوئی ءِ سرسبزینگ ءَ جھد ءَ اِنت ءُ مروچی اے جھد گیش ءُ گیواری جاہ ءَ سر اِنت۔آجوئی ءِ اے جنگ ءَ زورگریں مھترھند پاکستان ھما کچ ءَ نزور کرتگ کہ آ بلوچ سرمچارانی سر ءَ بیڑ کرت نہ کنت ، بلکیں وتی دیمپانی ءَ اِنت۔پاکستانی لشکر گوں تاھیریں دلے ءَ گشت جت نہ کنت ءُ ناں کہ وتی بنجلانی تہ ءَ پھریز اِنت۔
آیاں دیمتر ءَ گْوشتگ پاکستانی لشکر ءِ پروش چہ اد ءَ سھرا اِنت کہ آ پرایمنیں زھرشانی کنوکانی سر ءَ تیرگواری کنت ، جنین ءُ چکانی سر ءَ وتی زور ءَ کاربند ایت ، ءُ آیاں زندانی کنت۔ لشکر ءِ کمانڈو ءُ ایم آئی ءِ کارمند پولیس ءِ پوشاکاں مردمانی سر ءَ تیرگواری کن اَنت۔
گْوشتانک دئیاں درائینتگ بی این ایم ءِ راھشون بلوچ ءِ جیڑہ ءَ میان استمانی تک ءَ برگ ءُ سر کنگ ءَ سوبمند بیتگ اَنت۔بی این ایم ءِ باسک جھان ءَ بلوچستان ءَ برجاھیں زوراکیانی بارہ ءَ سھی کنگ ءَ اَنت ءُ مروچی جھان ءِ باسمائیں مردم بلوچستان ءِ جاورانی گوں بلوچ ءِ چماں چارگ ءَ اَنت۔آ زان اَنت کہ زورگریں پاکستانی لشکر بلوچستان ءَ مردمی اگبالاں لپاشگ ءَ اِنت ، پمیشکا جھانی تْرامگیج پاکستان ءِ آزار دئیں شونداتانی سر ءَ سکا ایراد گرگ ءَ اَنت۔
گڈ سر ءَ آیاں گْوشتگ انیگیں جاور ، گچینی بلوچ یکجھتی پتر ( بی وائی سی ) ءِ سر ءَ بیڑ ءُ سیاسی کارکنانی دزگیری ءَ جھان ءِ دیم ءَ پدر کرتگ کہ پاکستان میاریگ اِنت ۔ اے مھترھند ناں ایوک ءَ چہ سیاسی جھد ءَ ترس ایت بلکیں بلوچ ءِ زھگاں ھم پہ وت بیھار سرپد بیت۔مروچی پاکستانی لشکر لس کوشی ءَ سرگپتگ ءُ اے جاور گواچن اَنت کہ نی چد ءُ گیش مھترھند ءِ ماں بلوچستان ءَ زورگری برجاہ بیت نہ کنت۔
