بلوچ نیشنل موومنٹ ( بی این ایم ) ءِ درکارانی تک ءِ نیمگ ءَ میان استمانی تک ءَ رھوتکاری ءِ تکشام برجاہ اِنت، آئی مول بلوچستان ءَ برجاھیں ریاستی زوراکی، تیوک ءَ پر ایمنیں سیاسی کارکنانی بگیری ءَ ارش ءُ پہ بلوچ آجوئی جھد ءَ پلہ مرزی ءِ گرگ اِنت۔
ھمے تکشام ءِ درچ ءَ بی این ایم ءَ گوں اکوام متھدہ ءِ جھگیراں رھوت کرتگ ءُ پہ ڈاکٹر ماہ رنگ ءَ ھوار پہ آدگہ سْیاسی کارکنانی دزگیری ءِ بابت ءَ دلگوش ءِ لوٹ کرتگ۔ 23 مارچ 2025 ءَ اکوام متھدہ ءِ ریپوٹور بزاں ھیومن رائٹس ڈیپینڈرز ءَ بلوچستان ءِ بابت ءَ سرپد کرتگ ءُ پہ ڈاکٹر ماہ رنگ بلوچ ءِ دزگیری ءِ بگیری ءَ توار چست کنگ ءِ لوٹ کرتگ۔ ایشی پسو ءَ اکوام متھدہ ءِ ورکنگ گروپ ءَ وتی نبشتھی کلوہ ءَ گوشتگ کہ آیاں 26 مارچ بلوچستان ءَ پہ انسانی ھکانی پھریزگ ءُ درکانودی آوارجنیانی بگیری ءَ یک ھواریں درشانے شنگ کرتگ۔
بی این ایم ءَ ھمے تکشام ءِ آسر ءَ برتانیہ، یورپی یونین ءُ امریکہ ءِ بازیں پارلیمانی کارکن، سینٹر ءُ یورپی پارلیمان ءِ باسکانی گون ءَ رھوت کرتگ، چہ ایشی ءَ بلوچستان ءَ برجاھیں ریاستی زوراکی ءُ بلوچ یکجھتی کمیٹی ءِ سروکانی درکانودی دزگیری ءِ بگیری ءَ توار چست کنگ ءِ لوٹ کرتگ۔
برتانیہ پارلیمانی باسک انڈریو پیکس ءَ گوں رو دراتکی میانی، گوریچانی اپریکہ، اوگانستان ءُ پاکستان ءِ وزیر ھمیش پالکنر ءَ بلوچستان ءَ انسانی ھکانی پادمالی ءُ بلوچ یکجھتی کمیٹی ءِ سروکانی دزگیری ءِ بابت ءَ جست کرتگ کہ برتانیہ سرکار اے بابت ءَ گامگیج زورگ ءَ اِنت؟ ایشی پسو ءَ ھمیش پالکنر ءَ گوشتگ کہ آیاں بلوچستان ءَ انسانی ھکانی بگیریانی سر ءَ سکا بژن اِنت۔ آئی ءَ گوشتگ کہ برتانیہ درکانودی کوش ءُ زوریں بیگواھیاں گوں ترندیں دانکاں ایر جنت۔ ما ریاستان ءَ زور دیں کہ اے وڑیں گپانی سر ءَ جست ءُ پرس بہ کن اَنت۔ میارباراں جست بگر اَنت ءُ سانمندیں کھولانی گون ءَ انساپ بہ کن اَنت۔
آئی ءَ دیمتر ءَ گوشتگ کہ برتانیہ سرکار پاکستان ءَ زوریں بیگواھیانی میاربار لیکگ ءِ کوشست کنگ ءِ دلبڈی داتگ۔
ھمیش پالکنر ءَ بلوچ زھرشانی کنوکانی گون ءَ ھمدردی درشان کرتگ ءُ گوشتگ کہ برتانیہ زھرشانی کنوکانی گون ءَ شر ءُ ناشریں رویشتانی بابت ءَ سرپد اِنت ءُ اے لیکہ تچک اِنت کہ ابید ترسینگ یا بیھار ءَ گپ جنگ ءِ آجوئی راجمستری ءِ بنکی پدیانک اِنت۔
آئی ءَ گوشتگ کہ برتانیہ ءِ ھائی کمشنر پاکستان ءِ انسانی ھکانی ءُ کانودی وزیر ءِ گون ءَ رھوت کنگ ءَ اِنت ءُ آیانی گپانی میان ءَ بلوچستان ءَ انسانی ھکانی بگیری دیم ءَ آورتگ اَنت۔
ھمے رد ءَ لیبر پارٹی ءِ پارلیمانی باسک میری ریمر ءَ وتی نبشتھی پسو ءَ بلوچ مھلوک ءِ گون ءَ ھم سنتی ءُ بلوچستان ءِ جاورانی سر ءَ بژن درشان کرتگ۔ آئی ءَ گوشتگ کہ بلوچستان ءِ برجاھیں جاورانی بابت ءَ شر چارگ ءَ آں ءُ شمارا ھمے سدکی ءَ دے آں کہ برتانیہ سرکار ھم ھمے جاوراں سرپد اِنت۔
آئی ءَ ترانگ ءَ داتگ کہ 28 نومبر 2024 ءَ وزیر ھمیش پالکنر ءَ بلوچستان ءَ زوریں بیگواھی ءُ درکانودی کوش ایر جتگ اَت ءُ گوں ریاستاں لوٹ کرتگ کہ آ اے بھتامانی بابت ءَ جست ءُ پرس بہ کن اَنت ءُ انساپ بدے اَنت۔ آئی ءَ اے ھم گوشتگ کہ 10 دسمبر 2024 ءَ وزیر ھمیش پالکنر ءَ تچک کرتگ اَت کہ انسانی ھکانی بگیریانی سر ءَ برتانیہ ءِ ھائی کمیشن گوں پاکستان سرکار ءَ گپ ءُ تران کنت۔ ایشی ءِ تہ ءَ 4 ستمبر ءُ 19 نومبر ءِ گند ءُ نند ھم ھست اَنت۔
دومی نیمگ ءَ آئرلینڈ ءَ ھم بلوچ نیشنل موومنٹ ءِ رھوتکاری تکشام آسر شر گندگ بیتگ۔ آئرن پارلیمان ءِ باسک ریچرڈ بوئیڈ بیرٹ ءَ آئرش دری کارانی وزیر بلوچستان ءِ جاورانی سر ءَ جست گپتگ۔ تیوک ءَ ڈاکٹر ماہ رنگ بلوچ ءِ دزگیری ءِ سوب ءِ زانگ ءِ جھد کرتگ۔ آئی جست ءِ پسو ءَ آئرلینڈ ءِ نائب مزن وزیر ءُ دری کارانی وزیر سائیمن ہیرس ءَ گوشتگ کہ من بلوچستان ءِ انوگیں دزگیری ءُ اے دمگ ءِ ایمن نہ بوگ ءِ گپ جتگ کہ چنچو سال اِنت آزاردھی ءِ آماچ اَنت۔
آئی ءَ گوشتگ کہ آئرلینڈ اسلام آباد ءَ وتی سپارتکاری ءِ رد ءَ جاوراں چہ نزیک ءَ چارگ ءَ اِنت ءُ یورپی یونین ءِ مشن ءُ آدگہ ھم ھیالیں شریدارانی گون ءَ ھواری ءَ ایشی بگیری ءَ کار کنت۔
سائیمن ہیرس ءَ گوشتگ کہ آئرلینڈ گپ جنگ، ایمنیں زھرشانی ءُ سْیاسی شرکت ءِ آجوئی ءِ وڑیں انسانی ھکانی راھبندانی دیمروئی ءُ پہ پھریزگ ءَ سدک اِنت ءُ گوں پاکستان ءَ ھمے بنگپانی سر ءَ گپ ءُ تران کنت۔
آئی ءَ دیمتر ءَ گوشتگ کہ نومبر 2024 ءَ یورپی یونین ءُ پاکستان ءِ میان ءَ بیوکیں چاردھمی ھواریں کمیشن ءِ نیاد ءَ انسانی ھک، راجمستری ءُ سرکاری بنگپانی سر ءَ یورپی یونین ءَ چنچو ترس پدر کرتگ۔
