بلوچ راجی زْرمبشت ۔ امریکا تک ءِ چیردستی ءَ ماں واشنگٹن ڈی سی ءَ وائٹ ھاؤس ءِ دیم ءَ بلوچ چکچینی ءِ بگیری ءَ ماں بلوچستان ءَ برجاھیں روانک ءِ پلہ مرزی ءَ زھرشانی بیتگ۔ زھرشانی ءِ تہ ءَ جتائیں راجانی مردماں بھر زرتگ۔آیاں بلوچستان ءَ برجاھیں زوراکی ءُ مردمی اگبالانی بگیری ءِ سر ءَ گپ جتگ۔ آیاں چہ امریکا ءِ مھتر جوبائیڈن ءَ لوٹ کرتگ کہ آ بلوچ چکچینی ءَ بہ دار ایت۔
بی ایس او ءِ پیسرگیں سرکماش وھید ءَ وتی تْران ءَ گْوشتگ مئے زھرشانی پاکستان ءِ بلوچستان ءِ سر ءَ 75 سال ءِ زوراکیانی بگیری ءَ اِنت۔ ما ھما بلوچانی درداں شریدار ایں کہ آیانی مردم بلوچستان ءِ سر ءَ پاکستان ءِ زورگری ءِ پد ءَ آوار ءُ زور بیگواھی ءِ آماچ اَنت۔
آئی ءَ بلوچانی گوں ھندوستان ءَ سیادی ءِ پاکستانی بھتام ءِ رد کرتگ ءُ گْوشتگ ، اے بے بنیں گپے ۔ اگاں ھندوستان ءَ راستی ءَ بلوچانی پلہ مرزی بہ کرتیں جاور اے وڑ ءَ ھراب نہ بوت اَنت۔
سندی پاؤنڈیشن ءِ سوپی لگاری ءَ گْوشتگ پاکستان وتی بے سوبیانی بھتام ءَ ھندوستان ءِ سر ءَ جنت کہ آئی ءِ کْوھنیں پندل ءُ بے سوبیں دْراشے۔
بی این ایم ءِ باسک سمئی ءَ گْوشتگ پاکستان ءِ زورگری ءَ گر داں انی بلوچ ءِ چکچینی برجاہ اِنت۔ ما زور بیگواھی ءُ چہ کشت ءُ کوشاں سانمند بیتگیں کھولانی کش ءَ اوشتاتگ ایں۔
چہ ایشاں ابید ورلڈ سندی کانگریس ءِ راھشون راجہ ڈائر ، زھرشانی ءِ تْرامکار نبی بکش ءُ ھانی ءَ ھم گوں رسانکدر ءِ جھگیر ءُ زھرشانی ءَ بھر زیروکیں مردماں گپ جتگ۔
تْرندیں مولم ، ھور ، برپ ءُ گرمی ءِ زور ءِ سے درجگ سیلسیئس بیگ ءَ پد ھم مردم بستگیں ادار ءُ پاساں زھرشانی ءِ جاہ ءَ مچ بیتگ اَنت ءُ آیاں بلوچ چکچینی ءِ بگیری ءَ توار چست کرتگ۔
