مستونگ: بلوچستان نیشنل پارٹی ءِ سروک سردار اکتر مینگل ءَ 6 اپریل ءَ سھب ءِ نو ءَ چہ مستونگ ءَ دیم په شال ءَ زھرشانی ءَ روگ ءِ جار جتگ۔
سردار اکتر مینگل چہ مستونگ ءِ ھند لکپاس ءَ برجاھیں زھرشانی نندانک ءَ تران کرتگ ءُ گوشتگ که سرکار اِد ءَ مئے گپاں گوش دارگ ءَ نہ اِنت گڑا ما شال ءَ روین ءُ ھمود ءَ زھرشانی کن ایں۔
چوش که بلوچ یکجھتی کمیٹی ءِ سروک ڈاکٹر ماه رنگ ءُ آدگه کارکنانی دزگیر کنگ ءِ بگیری ءَ بی این پی ءِ زھرشانی روانک 28 مارچ ءَ چه وڈ ءَ په شال ءَ درکپتگ اَت که پاکستانی لشکر ءُ ریاستی ادارھاں باز جاھاں روانک داشتگ اَت ءُ مردمانی سر ءَ زوراکی کرتگ اَت. چه ایشی ءَ بی این پی ءِ روانک سردار اکتر مینگل ءِ سروکی ءَ مستونگ ، لکپاس ءَ نندانک ءِ دروشم مچ بیتگ ، ھمے میان ءَ سرکار ءَ گوں زھرشانی کنوکاں گپ ءُ تران کرتگ اَت که آیانی گپ ءُ تران بے سوب بیتگ اَت۔
