پسنی | پنجگور | دشت: بی وائی سی ءِ سروک ڈاکٹر ماه رنگ ، سبگت الله شاه جی ، بیبو بلوچ ، بیبگر ءُ آدگه کارکنانی دزگیر کنگ ءِ بگیری ءَ زھرشانی روانک کشگ بیتگ.
بنشون ءِ رد ءَ پسنی روانک چه نیادی سر ءَ بندات بیتگ ، چه بازار ءَ گوستگ ءُ پریس کلب ءِ دیم ءَ سر بیتگ، روانک ءَ جنین ءُ زھگاں ھوار آدگه مردماں بازیں کچے ءَ بھر زرتگ. زھرشانی روانک ءَ ھواریں مردماں بی وائی سی ءِ دزگیر کنگ بیتگیں سروکاں ھوار زور بیگواھیں مردمانی اکس ءُ پلی کارڈ دست ءَ بیتگ اَنت ءُ اوگام جتگ.
زھرشانی کنوکاں گوشتگ که بلوچستان ءِ وتگڑیں سرکار سرپراز بگٹی ءِ سروکی ءَ بلوچ ءِ لس مھلوک ءُ بلوچ جنینانی سر ءَ زوراکی کنگ بوگ ءَ اِنت. ڈیھ ءِ کانود ءُ رھبنداں په وتی زد ءُ کینگاں کارمرز کنگ ءَ اَنت ، مارا انچش سما بوگ ءَ اِنت که بلوچستان ءِ پارلیمنٹ ءَ نشتگیں مردم بلوچ نه اَنت.
ھمے وڑ ءَ پنجگور ءَ ڈاکٹر ماه رنگ ، سبگت الله شاه جی ، بیبو بلوچ ، بیبگر ءُ بی وائی سی ءِ آدگه کارکناں ھوار زوریں بیگواھیانی بگیری ءَ زھرشانی روانکے کشگ بیتگ.
روانک چه سوردو ءَ بندات بیتگ ءُ کلیم الله چاراه ءَ مچ بیتگ اَنت. زهرشانی ءَ سیاسی ءُ چاگردی کارکناں ھوار، زوربیگواھیں مردمانی کھولاں تران کرتگ. آیاں ڈاکٹر ماه رنگ ءُ زور بیگواھیں مردمانی زوت یل کنگ ءِ لوٹ کرتگ.
چه ایشی ءَ ابید مرچی دشت ، کُلدان ءَ بی وائی سی ءِ سروکانی دزگیر کنگ ءِ بگیری ءَ زھرشانی روانکے کشگ بیتگ. زھرشانی ءَ جنین ءُ زھگاں بی وائی سی ءِ سروکانی اکس ءُ پلی کارڈ دست ءَ بیتگ ءُ اوگام جتگ. آیاں ڈاکٹر ماه ءُ آدگه کارکنانی یل کنگ ءِ لوٹ کرتگ.
