بلوچ نیشنل موومنٹءِ سرکماش ڈاکٹر نسیم بلوچ ءَ ماں چاگردی رسانکدر ایکس ءَ نبشتگ کہ کسانیں ائید (عید الفطر) ءِ نوک سرجمیں جھان ءَ رژنائی ءُ وشی تالان کنان ءَ درا بوتگ۔ بلے آئی ءِ رُژنائی بلوچستان ءِ تھاریں گساں مشکل اِنت کہ سر بہ بیت۔
آئی گوشتگ کہ اے گم جتیں سرڈگار ءَ وشی ءُ شادانی ءِ گوات گار اِنت۔ بے تواری ءُ پرساں ایشانی جاگاہ گپتگ۔ پہ بیگواھیں مردمانی کھولاں کندگ ءِ توار دیر اِنت کہ گوں گریوگ ءُ زاری ءَ مٹ بوتگ اَنت۔ دیر اِنت کہ زوراکی ءُ نا انساپیاں ائید ءُ وشیانی ندارگ ھلاس کرتگ اَنت۔
آئی گوشتگ کہ جھان ءِ آدگہ دمگاں زھگ زان اَنت کہ ائید اِنت ءُ پہ سوگات ءُ شیرکنیاں سھب ءَ مھلہ چہ واب ءَ پاد کاینت، بلے بلوچ ءِ زھگ سھب ءَ پاد کئیت گند ایت کہ منی پت ءِ جاگاہ ھورک ءُ ابیتک اِنت، بزان کہ دوشی شپ ءِ تھاری ءَ زورگراں آوار جتگ۔ مات کہ پہ وتی زھگاں وشیانی تیاری کنگ ءَ بہ بنت، ایشی ءِ جاہءَ آ نادْراھجاہ ءُ کبرستاناں لاشانی پجار کنگ ءَ دزگٹ اَنت ءُ دوا کنگ ءَ اَنت کہ اے لاش منی زھگ ءِ مہ بیت۔ دمک راج ءِ وشیاں بار بہ بنت بلے اے لشکری چوکیاں سر بار اَنت۔ ھرکس کہ گوز ایت بزان سر ئِے تھاریں زندان ءَ کپ ایت۔
ڈاکٹر نسیم ءَ گوشتگ کہ دھک گْوستگ اَنت کہ پاکستان ءَ بلوچستان ءِ ائید گم ءِ موسم جوڑ کرتگ اَنت۔ زور بیگواہ کنگ، جنگ ءُ کشگ، پاکستانی لشکر ءِ لشکر کشی ائید ءِ پاکیں روچ ءَ ھم دارگ ءِ نام ءَ نہ زانت۔ ھما وھد ءَ کہ (مسلمانیں) جھان رھم ءُ ھک پھلی، درگوزی ءِ گپ ءُ تبلیک ءَ کنگ ءَ اِنت، پاکستانی ریاست وتی زوراکی ءِ پالیسی ءَ دیم ءَ بران اِنت دانکہ بلوچ کھول ھچ بر ایمنی مہ گند اَنت۔
آئی گوشتگ کہ اے ائید ءَ بلوچستان ءَ بے کساس جاگاہ ھورک اَنت۔ ھما جاگاہ کہ یک وھدے ءَ پِت ءُ برات ءُ زھگے ءِ بوتگ اَنت، مروچی بلوچ بوگ ءِ میار ءَ برگ ءُ بیگواہ کنگ بوتگ اَنت۔ پد ءَ ھم اے زوراکی ءِ تہ ءَ بلوچ راج ءَ وتی ھوسلہ ءُ ھاٹیگ یلہ نہ داتگ۔ بلوچ ائید ءِ روچ ءَ ھم پہ وتی شرپ ءُ آجوئی ءَ جھد ءَ اَنت ۔
آئی گوشتگ :انچوش کہ جھان شادمانی کنت بلوچستان ءِ نیمگ ءَ ھم چماں بند مہ کنت ءُ گوں ما تپاکی ءُ یکجھتی ءَ بہ اوشت ایت۔ ائید ءِ وشی مارا ھما مردمانی یات ءَ بہ دنت کہ آ چہ وشیانی بنیادی ھک ءَ زبھر اَنت۔ اے گپ ءَ دلجم بہ بہ اِت کہ یک روچے مئے ائیداں دگہ دلرنجی ءِ نشان نہ بیت۔
