زور بیگواھیں ڈاکٹر دین مھمد ءِ جنک ءُ بی وائی سی ءِ سروک سمی دین ءِ گھار مھلب دین ءَ پریس کانپریس کرتگ ءُ گوشتگ کہ شما کراچی پریس کلب ءِ اھوالکار زان اِت کہ سمی دین ءَ چنچو آئید گوں زور بیگواھیں مردمانی کھولاں کراچی پریس کلب ءِ دیم ءَ پہ وتی پت دین جان ءِ آجوئی ءَ زھرشانی کنگ ءَ گوازینتگ۔ بلے اے سال ءَ آئید ءِ روچ ءَ سمی دین گوں آدگہ زوربیگواھیں مردمانی کھولاں زھرشانی کنگ ءَ ابید وت بندیگ اِنت۔
آئی ءَ گوشتگ کہ سمی دین ءَ وتی کسانی گوں ھمے زھرشانیاں گوازینتگ۔ گوستگیں دوازہ سال اِنت کہ پہ وتی پت دین جان ءِ آجوئی ءَ زھرشانی کنگ ءَ اِنت کہ آ چہ وتی کار ءِ سرءَ زور بیگواہ کنگ بیتگ۔ چہ ھما روچ ءَ بگر داں مرچی سمی دین ءَ آئید ءُ وشیانی روچ پہ وتی پت ءَ ھوار آدگہ بیگواھیں مردمانی آجوئی ءَ گوں روانکءُ زھرشانیاں گوازینتگ۔ سمی دین ءِ جھد تیوک ءَ پہ وتی پت ءَ نہ اِنت بلکیں پہ ھمک ھما زور بیگواھگیں مردماں اِنت کہ آ ریاست ءِ ردیں شونداتانی آماچ اَنت۔ سمی دین چہ سالاں زوریں بیگواھی ءُ ریاستی زوراکیانی بگیری ءَ جھد ءَ یک ترندیں توارے جوڑ بیتگ ءُ سرجمیں بلوچستان ءِ درداں وتی سرپد بوگ ءُ شمئے اھوالکارانی دیم ءَ درشان کنگ ءَ اِنت۔ دانکہ چہ شمئے رد ءَ داں توانمندیں ایوناں آئی توار سر بہ بیت بلے توانمندیں واکداراں درکانودی بندیگ کرتگ ءُ آئی ءَ بے توار کنگ لوٹگ ءَ اَنت۔
مھلب دین ءَ گوشتگ کہ بلوچستان ءَ یکشل ءَ بیوکیں ویل، زوریں بیگواھی ءُ درکانودی کوش، ماہ رنگ بلوچ، بیبو بلوچ، بیبگر ءَ ھوار سدانی کچ ءَسیاسی کارکنانی درکانودی دزگیری ءِ بگیری ءَ یکشلیں زھرشانیانی درچ ءَ بلوچ یکجھتی کمیٹی ءُ سول سوسائٹی ءَ زھرشانی کرتگ بلے سند پولیس ءَ زھرشانی ءِ سرءَ ارش کرتگءُ سمی دین ءَ ھوار آدگہ زھرشانی کنوک دزگیر کرتگ اَنت، بلے چہ آمیدگس ءِ یل کنگ ءَ ابید آمیدگس ءِ گپ زورگ نہ بیتگ ءُ پاکستان پیپلز پارٹی ءِ سرکار ءِ گوشگ ءِ پد ءَ 3 ایم پی او ءِ رد ءَ پہ یک ماھے ءَ بندیگ کرتگ دانکہ زوریں بیگواھی ءِ جیڑہ ءَ گوں زور ءَ بے توار بہ کنت اے ھچ پیم ءَ نہ بیت۔
آئی ءَ گوشتگ کہ چہ زوریں بیگواھی ءُ ریاست ءِ زور ءَ جیڑھانی گیش ءُ گیوار کنگ ءِ شوندات ءِ سر ءَ چہ بلوچستان ءَ ھزارانی کچ ءَ کھول سانمند بیتگ اَنت ءُ پاکستان ءِ مزن آمیدگس آیاں انساپ دات نہ کنت۔ چہ ھمیشی سوب ءَ بلوچانی زھرشانی کنگ ءِ ارادہ مھکم اِنت کہ داں انساپ رسگ ءَ توار چست کن اَنت۔ چہ ماہ رنگ بلوچ ءُ سمی دین ءِ دزگیری ءَ ریاست ءِ توانمندیں بھرگ ھمے سرپد بیت کہ آیاں بے توار کنت، بلے دانکہ مئے پت دین مھمد ءَ ھوار چہ سرجمیں بلوچستان ءَ زوریں بیگواھی ھلاس کنگ نہ بیت زھرشانی کنوک بے توار کنگ نہ بنت۔
مھلب دین ءَ گوشتگ کہ سمی دین، ماہ رنگ بلوچ ءُ آدگہ جنیناں آئید ءِ روچ زندان ءَ گوازینتگ، بلے سرجمیں بلوچستان ءَ آئید ءِ روچ ءَ زوریں بیگواھی، ریاست ءِ ردیں شونداتانی بگیری ءُ پہ زور بیگواھیں مردمانی آجوئی ءَ زھرشانی کنگ بیتگ۔ زوریں بیگواھی نہ تیوک ءَ یک کھولے ءِ جیڑہ اِنت بلکیں منی وڑ ءَ سدانی کچ ءَ زھگانی پت زور بیگواہ اَنت ءُ آ چہ آیانی آجوئی ءَ ابید بے توار نہ بنت۔پہ وتی پت دین مھمد ءُ آدگہ سدانی کچ ءَ کھولانی آزیزانی آجوئی ءَ مئے جھد برجاہ بیت۔
آئی ءَ گوشتگ کہ من گوں ریاست ءِ توانمندیں بھرگ ءُ پیپلز پارٹی ءِ سند سرکار ءَ لوٹ کن آں کہ منی گھار سمی دین ءِ سر ءَ دروگیں بھتاماں ھلاس بہ کنت ءُ آئی ءَ چہ زندان ءَ آجو بہ کنت۔
