بلوچ راجی آجوئی سنگر (براس) ءِ جارکش بلوچ ھان ءَ ماں رسانکدر ءَ وتی شنگ کرتگیں درشانے ءَ گوشتگ کہ براس ءِ سرمچاراں سرجمیں بلوچستان ءَ یک مھکم ءُ شریں لشکری تکشامے ءِ میان ءَ سرجم ءَ 72 کار کرتگ۔ اے کاراں زورگریں پاکستانی لشکر، نیم لشکری ٹولی، چیریں ادارہ، ریاستی پلہ مرزیں کشندہ ٹولی ، سرکاری شوربندی، مادن بروکیں گاڑی ءُ آدگہ ریاستی نپ نشانگ کرتگ اَنت۔ اے ارشاں زورگریں پاکستانی لشکر ءِ کم چہ کم 32 کارمند مرتگ ءُ 40 ءَ گیش ٹپی بیتگ، چاردہ گاڑی سرجم ءَ تباہ بیتگ۔
آئی ءَ گوشتگ کہ ھمے میان ءَ بلوچستا ن ءِ جتائیں دمگاں سی ءَ گیش جاہ ءَداں باز اداراں شھدگ بستگ اَنت۔ اے دگانی بندگ ءِ میان ءَ سرمچاراں نہ تیوک ءَ گاڑی داشتگ اَنت بلکیں ھمے پٹ ءُ پول ءِ رد ءَ دژمنیں لشکر ءُ ریاستی کارمند پجارگ ءَ پد نشانگ کرتگ اَنت۔ اے لشکری کارشونی براس ءِ مھکم ءُ چیر جنگیں بودناکیانی برورد اِنت۔
جارکش ءَ گوشتگ اے ارش 27 مارچ 1948 ءِ درگت ءَ کنگ بیتگ اَنت کہ زورگریں ریاست پاکستان ءَ لشکرکشی ءِ رد ءَ بلوچ سرڈگار دستیگ کرتگ۔ اے زورگپتی بلوچستان ءِ گوستانکی، زمینی کچ ءُ کساس ءُ دودمان ءِ بگیر بیتگ۔ ایشی بگیری ءَ بلوچ لس مردماں چہ بنداتی روچاں گھگیری کرتگ۔ براس ءِ نیمگ ءَ کنگ بیتگیں لشکری سرگرمی نہ تیوک ءَ اے زورگپتی ءِ بگیری ءَ چیدگی ءُ کردی گھگیری یے بلکیں اے ھمے گپ ءَ پیش دار ایت کہ بلوچستان مرچی ھم زورگپتیں سرڈگارے۔
بلوچ ھان ءَ گوشتگ کہ براس ءِ ھمے لشکری تکشام ءِ میان ءَ نوشکے ءَ یک ترندیں میڑے ءَ سرمچار جھانزیب مینگل پنام بالاچ نمیران بیتگ۔
آئی ءَ گوشتگ کہ اے میڑ 27 مارچ ءِ شپ ءَ نوشکے ءِ ھند کادرآباد ءَ بیتگ ۔ زورگریں لشکر ءَ پہ سرمچار ءِ دزگیری ءَ بیڑ برتگ، داں سے ادارں برجاھیں میڑ ءِ میان ءَ شھید سرمچار جھانزیب تیوک ءَ گوں دژمن ءَ دیم پہ دیمی کرتگ ءُ زورگریں لشکر ءِ ھشت کارمند مرتگ ءُ باز ٹپی کرتگ ءُ آئی لشکرکشی بےسوب کرتگ۔
جارکش ءَ گوشتگ کہ بلوچ راجی آجوئی سنگر شھید سرمچار جھانزیب مینگل ءَ ستک شانی ندر کنت ءُ ھمے گپ ءَ گوش ایت کہ شھیدانی منزل ھم براس ءِکارشونی، کرد ءُ بنکی ارادہ اِنت۔ براس اے گپ ءَ سدک اِنت کہ شھیدانی کاروان ءِ گڈی منزل ءَ سر کنگ مئے راجی ءُ گل ءِ زمہ واری اِنت ءُ بلوچستان ءِ آجوئی ءِ لوٹ ءِ راست کنگ مئے جھد ءِ بنکی توان اِنت۔
بلوچ ھان ءَ گوشتگ کہ براس وتی اے انوگیں لشکری تکشام ءَ دژمن ءِ بگیری ءَ یک ھم سنتیں گھگیری یے ءِ بنگیج لیک ایت، اے راجی آجوئی جنگ ءِ اے بھر ءَ دژمن ءِ لشکری توان، ریاست ءِ گپ ءُ ھندی کمکارانی بگیری ءَ یک تچکیں کلوھے۔ اے ارشانی مول تیوک ءَ تاوان نہ بیتگ بلکیں دژمن ءِ توان، رپتار ءُ بیسہ ءِ یکشل ءَ نہ منگ اِنت۔ اے ارش داں بلوچستان ءِ آجوئی ءَ گوں ترندی ءَ برجاہ بنت۔
