شال: بلوچ یکجھتی کمیٹی ءِ سروک ڈاکٹر ماہ رنگ بلوچ ءِ گھارنادیہ بلوچ ءَ ماں چاگردی رسانکدر ایکس ءَ نبشتگ کہ مرچی من ءُ مات زندان ءَ شتگ ایں دانکہ گوں ڈاکٹر ماہ رنگ ءَ گندُک بہ کن ایں۔ ما داں ھشت اداراں دارگ بیتگ ایں ءُ پد ءَ ھم چہ مزن شیشیگیں دیوالے ءِ پشت ءَ تیوک ءَ پون ءِ سر ءَ گپ پرماھگ بیتگ۔
آئی ءَ گوشتگ کہ زندان ءِ کارمند درس مٹ بیتگ اَنت ءُ انٹیلی جنس ءِ مردمانی چم سک اَنت۔ پہ گندُک ءَ جتا یک کوٹی یے ٹھینگ بوگ ءَ اِنت کہ آئی تہ ءَ کیمرہ ءُ مائیکرو پون جنگ بوگ ءَ اِنت۔چہ آمیدگس ءِ پرمان ءَ ابید مارا گوں ماہ رنگ ءَ زاتی گندُک ءَ نیلگ ءَ اَنت، چہ ایشی آئی بنکی ھکانی تچکیں بگیری اِنت۔
نادیہ بلوچ ءَ گوشتگ کہ ماہ رنگ سکا نادراہ اِنت ءُ سے روچ بیت کہ چہ ورگ ءَ پد آئی جاور ناگیگ بنت۔ ما یکشل ءَ لوٹ کنگ ءَ ایں کہ چونیں ھم ڈاکٹرے پہ درمان کنگ ءَ موکل بہ دے اِت ۔ زی یک نوک سکیں ڈاکٹرے آتکگ آئی چارتگ بلے ما چہ آئی دلجم نہ ایں۔
آئی ءَ گوشتگ کہ ما ھمے لوٹءَ کن ایں کہ یک شریں ڈاکٹرے زوت دیم دیگ بہ بیت ءُ آئی ءَ بہ چار ایت۔ آئی تب سکا ناوش اِنت ءُ مارا ترس اِنت کہ آئی جاور گنتر بنت۔
نادیہ بلوچ ءَ گوں درسیں بھرگاں لوٹ کرتگ کہ آ زوت توار چست بہ کن اَنت دانکہ آمیدگس ءِ پرمان ءِ رد ءَ گوں ماہ رنگ ءَ زوت انساپ کنگ بہ بیت۔
