آواران: چہ مشکے ءَ زورگریں پاکستانی لشکر ءَ دگہ چار زور بیگواھیں ورنا کشتگ ءُآیانی لاش چگل داتگ اَنت۔
کشگ بیتگیں ورنایانی نام زھیر نیاز ء نیاز مھمد، ارشاد واھد ء ابدُلواھد، سیپ ء ابدُلتیپ ءُ توسیپ ء ازیم اِنت۔ اے چاریں مردم گوں دگہ پنچ ورنا ءَ 28 پروری ءِ شپ ءَ چہ مشکے ءِ جتا جتائیں جاھاں آوار جتگ ءُ بیگواہ کرتگ اَنت۔
بنشون ءِ رد ءَ گوں ایشاں ھوار بیگواہ کنگ بیتگیں چار ورنا کامران ء مھمدآلم، مھراج ء نیاز مھمد، مومن ء اسلم ءُ ھپیز بیگواھی ءَ پد دو سے روچانی میان ءَ کشتگ ءُ آیانی لاش چگل دیگ بیتگ اَنت۔
انچوش گوشگ بوگ ءَ اِنت اے کشگ بیتگیں ورنایانی تہ ءَ زھیر نیاز پیسر ءَ گوں چار ورنایاں کشگ بیتگیں مھراج نیاز وت ماں وت برات اَنت۔
ھندی اھوالکار ءِ رد ءَ لھتیں روچ پیش زورگریں پاکستانی لشکر ءَ پہ پندل گجر بازار ءُ کِر ءُ کشاں گوں مردماں گوشتگ اَت کہ زھیر نیاز، ارشاد واھد، سیپ ءُ توسیپ سلاہ بندیں گلانی مردم اَنت ھمیشاں مئے دست ءَ بدے اِت۔ مردماں زانتگ اِت اے چاریں مردم پاکستانی لشکر ءَ بیگواہ کرتگ اَنت ءُ آیاں ھمے گمان کرتگ اَت کہ اے چاریں ورنایاں لشکر دروگیں میڑاں کش ایت۔
چوش کہ پیسر ءَ چار ورنا پاکستانی لشکر ءَ دروگیں میڑ ءَ کشتگ اَت آیانی کھولاں تامربندی کلوہ ءِ دروشم ءَپاکستانی لشکر ءِ میڑ ءِ گپ دروگ کرتگ اَت ءُ آیانی بیگواھی ءِ گپ راست کرتگ اَت۔
مشکےءَ چہ دامگءِ نیستی ءِ سوب ءَ پاکستانی لشکر ءِ زوراکیانی رپورٹ باز کم دیم ءَ کیت۔ گوستگیں یک ءُ دو ماہ ءِ میان ءَ پاکستانی لشکر ءَ چہ مشکے ءَ باز مردم آوار جتگ ءُ بیگواہ کرتگ اَت کہ آیانی تہ ءَ ورنا ءُ کماش ھم ھوار اَنت۔
