بلوچ آجوئی لوٹوکیں سروک رھیم بلوچ ایڈوکیٹ ءَ ماں چاگردی رسانکدرایکس ءَ وتی شنگ کرتگیں درشانے ءَ گوشتگ کہ انوگیں روچاں بلوچستان ءَ زورگریں پاکستانی لشکر، چیریں ادارہ ءُ سرپراز بگٹی ءِ سروکی ءَ برجاھیں وتگڑیں انتزامیہ زور بیگواھیں بلوچانی کھول، جنین، زھگ ءُ سیاسی کارکنانی بگیری ءَ بے کساس زوراکی کنگ ءَ اَنت، انسانی ھکانی گل بی وائی سی ءِ سروک ڈاکٹر ماہ رنگ بلوچ، بیبو بلوچ، بیبگر بلوچ ءُ سمی دین بلوچ ءَ ھوار آدگہ سیاسی کارکنانی دزگیری ءُآیانی بگیری ءَ دروگیں کیس جنگ ءَ گوں ترندیں دانکاں ایر جن آں۔
آئی ءَ گوشتگ کہ زورگریں ریاست ءِ نیمگ ءَ زوراکی نہ تیوک ءَ انسانی ھکانی ءُ راجمستری آجوئی ءِبگیری اِنت، بلکیں پاکستان ریاست ءِ زورگری، لٹءُ پلی کرد ءُ ابرم ءَ ھم پیش کنگ ءَ اِنت۔ بلوچ جنین، زھگ، انسانی ھکانی سرگرمیں سروک ءُ کارکنانی بگیری ءَ ریاست ءِ آزار دھیں گامگیج نہ تیوک ءَ انسانی بنکی ءُ راجمستری آجوئی ءِ ھکانی لگتمال کنگ اِنت بلکیں پہ مردمگری ءِ بگیری ءَ میارباری یے زانگ بیت۔
بلوچ سروک ءَ گوشتگ کہ راستی ھمیش اِنت زورگریں ریاست چہ بلوچانی راجمستری زرمبشتاں مدام ترس آماچ بیتگ، چی ءَ کہ چہ بلوچ زرمبشت ءِ راجمستری جنگ ءِ سرگرمیاں زورگریں ریاست ءِ ناشریں کرد ءُ میارباری پاشک بیتگ اَنت۔ وھدے زورگریں ریاست لوٹ ایت چہ ترس ءِ پارست ءَ بلوچسانی راجمستری جھد ءَ بے توار بہ کنت دانکہ ناشریں لشکر، چیریں ادارہ ءُ کشندہ ٹولی چہ زوریں بیگواھیءُ درکانودی کوش ءِ رد ءَ بلوچانی چکچینی ءَ بہ کن اَنت ءُ آیانی اے وڑیں میارباری چیر دیگ بہ بنت۔
رھیم بلوچ ایڈوکیٹ ءَ گوشتگ کہ بلوچ جنینءُ زھگانی بگیری ءَریاستی ناشرکاری ءِ سر ءَ پنجاپ ءَ ھوار سرجمیں پاکستان ءِ مردم ءُ سیاسی ٹولیانی اے بے تواری ھمے تچک ءُ راستی ءَ پدر کنگ ءَ اِنت کہ پاکستان ءُ زورگپتیں بلوچستان دو جتائیں ھستمان اَنت۔ آیانی گوستانک، دودمان نپانی لوٹ ءُ مول، پدریچ ءِ لوٹ نہ تیوک ءَ چہ یکے دومی ءَ گسا اَنت بلکیں وت ماں وت کینگدار اَنت۔ چہ پاکستان ءِ نوک آبادکاری ءَ بلوچستان ءِ آجوئی اے ھونی جیڑہ ءَ ھلاس کنت ءُ جوانیں گیش ءُ گیوارے بیت۔
