بلوچ وومن پورم ءِ بنجاھی سروک ڈاکٹر شلی بلوچ ءَ ماں چاگردی رسانکدر ایکس ءَ نبشتگ کہ بلوچی زُبان ءِ کسان سالیں شائر نبیل نود زی چہ گْوادر ءَ ریاست ءِ چیریں ادارھانی مردماں زور بیگواہ کرتگ کہ انگت آئی ءِ ھچ وڑیں ھال نیست۔ بلوچستان ءِ تہ ءَ جاورروچ پہ روچ گیش ناگیگ بوان اَنت مردمانی گار ءُ بیگواھی ءِ درچ ودان اِنت، یک نیمگءَریاست مردماں بیگواہ کنگءَ اِنت ءُ پدا پُر ایمینیں زھرشانی کنگ ءِ ھک ءَ ھم پچگِرگ ءَ اِنت، اے زوراکی ءِ بگیری ءَ زھرشانی کنوکیں بازیں مردم زندانی کنگ بیتگ ءُ لھتیں ورنا شھید بیتگ۔
آئی ءَ گوشتگ کہ پہ اے زوراکیءِ دارگ ءَ مارا یکجاہءُ یکیں تلو ءِ سر ءَ بوگی اِنت، اے وھد پرک ءُ پیر ءِ نہ اِنت بلکیں یکمشتی ئیگ اِنت، چہ مئے یکجاھی ءَ ریاست الم پروش وارت۔
