بلوچ راجی رھشون ءُ بلوچستان لبریشن پرنٹ ( بی ایل ایپ ) ءِ سروک ڈاکٹر اللہ نزر بلوچ ءَ گوشتگ کہ بلوچ راجی جھد چہ پاکستان ءِ رستری زوراکیاں ابید دارگ نہ بیتگ ءُ انگت نہ بیت۔ پشت ماں پشت ءَ بے مٹیں دیمونی دیوکیں بلوچ راجی زرمبشت ءَ پروش نہ وارتگ، مھکم اِنت ءُ گیشتر توانمند بیتگ۔ ھمک شھید ءِ رتکگیں ھوناں اے جھد ءَ را دگہ ھاٹیگے بکش اتگ ءُ مرچی بلوچ راج ءَ ھمے پیش داشتگ کہ زورگریں ریاست ءَ وتی گوں درسیں پندلاں ھوار انگت پروش وارتگ۔
آئی ءَ گوشتگ کہ بلوچ پسگانی ھون ءِ ھمک ترمپ ءَ نوکیں گوستانکے زندگ دارگ ءَ اِنت، یک انچیں گوستانکے کہ بلوچ راج ءِ جھد، دیمونی ءُ آجوئی ءِ چیدگ بیتگ۔ اے جھد ءَ دیمونی دیوک پہ مدامی گوستانک ءِ تہ ءَ ابدمان اَنت۔ وھدے کہ ھما ناشرکار دژمن ءِ کمکار بیتگ اَنت ءُ وتی راج ءِ بگیری ءَ پندل سازگ ءَ اَنت آیاں بلوچ راج نہ بکش ایت ءُ گوستانک آیاں بے ھال نہ کنت۔ آ مدام راجدروہ، کمشرپ ءُ رزوائی ءِ چیدگ بنت ءُ یاد کنگ بنت ءُ گوستانک ءِ آمیدگس آیاں میاربار لیک ایت۔
بلوچ رھشون ءَ گوشتگ کہ بلوچ راج ءِ سوبمندی ءُ آجوئی گوں دیوال ءَ نبشت اِنت۔ زورگریں پنجاپی لشکر وتی درسیں توان، مڈیءُ زوراکیاں ابید بلوچ سرڈگارءِ سر ءَ گیشتر داشت نہ کنت۔ آ روچ نزیک اِنت وھدے کہ بلوچ راج چہ وتی سرڈگار ءَ دژمن ءِ سلھیں ھستمان ءَ سرجم ءَ پلگار ایت۔ بلوچ راجی آجوئی جھد گوں تیزی ءَ جنزاں اِنت ءُ اے زرمبشت ءَ نوں ھچ وڑیں زور داشت نہ کنت۔
