شال: بلوچ یکجتی کمیٹی ءِ سروک ڈاکٹر ماه رنگ ءُ آدگه زھرشانی کنوکانی دزگیر کنگ ءِ بگیری ءَ بلوچستان ءِ جتا جتائیں ھنداں زھرشانی ءُ تھتگ بند ھڑتال برجاه اِنت.
بنشون ءِ رد ءَ بی وائی سی ءِ جار ءِ پد ءَ شال، مستونگ، کلات، ھزدار، چاگے، نوشکے، واشک، تربت ، پنجگور، آواران،کوھلو ءُ ھب چوکی ءَ ھوار بلوچستان ءِ جتا جتائیں ھند ءُ دمگاں زھرشانی ءُ تھتگ بند ھڑتال برجاه اِنت.
زھرشانی کنوکاں شال ءَ پولیس ءِ تیرگواری ءُ زوراکی ءَ ھوار بی وائی سی ءِ سروک ڈاکٹر ماه رنگ ءُ آدگه مردمانی دزگیر کنگ ءِ بگیری ءَ دگ بند کرتگ اَنت ءُ زھرشانی کرتگ.
چوش که زی شال ءَ پولیس ءَ بی وائی سی ءِ زھرشانی ءِ سر ءَ تیرگواری کرتگ اَت که چه ایشی ءَ سے مردم بیران ءُ سی ءُ پنچ ٹپی بیتگ ات. ھمے درگت ءَ ڈاکٹر ماه رنگ ءِ سروکے ءَ گوں لاشانی ھمرائی ءَ شال ءَ سریاب دگ ءَ زھرشانی کنگ بیتگ اَت که مرچی سھب پولیس ءَ زھرشانی ءِ سر ءَ بیڑ برتگ ءُ ڈاکٹر ماه رنگ ءَ ھوار بازیں کچے ءَ مردم دزگیر کرتگ اَت.
