بلوچ نیشنل موومنٹ ( بی این ا یم ) ءِ جارکش ءَ گوشتگ کہ شال ءَ کودکیں زھرشانی کنوکانی سر ءَ ارش ءَ سے زھرشانی کنوک ھبیب، امداد ءُ نیامت کشگ بیتگ اَنت۔ زھرشانی کنوکانی کوش ءُ بلوچ یکجھتی کمیٹی ءِ سروک ڈاکٹر ماہ رنگ ءَ ھوار آدگہ مردمانی دزگیری ءُ زوریں بیگواھی پاکستان ریاست ءِ زوراکیانی یک نوکیں درے گیش کنگ اِنت۔ نہ تیوک ءَ سروک زور بیگواہ کنگ بیتگ اَنت بلکیں شھیدانی لاش ءُ کھول ھم ریاستی زوراکیانی آماچ بیتگ اَنت۔ اے پاکستان ءِ سسائی ءُ دودمانی پروش ءَ پدر کنت۔
آئی ءَ گوشتگ کہ ڈاکٹر ماہ رنگ بلوچ ءَ ھوار آدگہ رھشون ایمن، دلیل، زانت ءُ گوں لیکھے ءِ بنیاد ءَ ھک ءِ جنگ ءَ مڑگ ءَ اَنت۔ بلے پاکستان ریاست ایمنیں توار ءَ پہ وتی وتگڑیں ھستمان ءَ یک ترسے سرپد بیت چی ءَ کہ اے ھما ھستمان اِنت راجانی گوستانک ءِ بگیر اِنت ءُراجانی آجوئی ءُ ھستمان ءِ کینگ اِنت۔ پمشکا ریاست ھمے سرپد بیت کہ زوراکی ءَِ ابید آئی ھستمان ھلاس بیت۔
جارکش ءَ گوشتگ کہ ما پاکستان ریاست ءَ ھمے کلوہ ءَ دیگ لوٹ ایں کہ تو مئے سروکاں آوار جت کن ئے بلے آیانی لیکہ ءِ جھد ءُ آیانی توار کدی ھم بندیگ کنگ نہ بیت۔
بلوچ نیشنل موومنٹ ھمے سرپد بیت کہ اے شال ءَ کودکیں زھرشانی کنوکانی سر ءَ ریاست ءِ زوراکی ءُ مرچیگیں ارش ڈاکٹر ماہ رنگ ءَ ھوار سروکانی دزگیری ءُ زوریں بیگواھی ریاستی چکچینیءُ زوراکی نوکیں درے ءَ سر بیتگ، ریاست پہ بلوچ راجی زرمبشت ءِ ھلاس کنگ ءَ رستری کنگ ءَ اِنت بلکیں چہ مئے گمان ءَ ڈن بہ بیت، بلے بلوچ راج نہ تیوک ءَ ایشی داشتگ کنت بلکیں پہ وتی راجی ھستمان ءُ پدریچ ءَ چد ءُ گیش دیمونی دیگ ءِ سوڑگ کرتگ۔ بنامی پاکستان ریاست ءُ آئی وتگڑیں بلوچانی بھر ءَ کپ ایت کہ آ اے مھشتریں وھد ءَ گوں پنجاپی ءَ اوشتاتگ اَنت۔
آئی ءَ گوشتگ کہ پاکستان یک ایمٹی ریاستے ءِ بوگ ءَ ابید بلوچستان ءَ وتگڑیں رٹ ئے ھلاس کرتگ ءُ بلوچستان ءِ سرڈگار پہ گرانبھائیں آجوئی ءِ وش اتک ءَ جاڑیگ بوگ ءَ اِنت ءُ اے ترس ءِ گنتریں ریاستی زوراکی ءِدروشم گندگ بوگ ءَ اِنت۔ بلے ریاست ءَ تیوک ءَ یک مارشتے بوگ لوٹ ایت کہ نوں بلوچ بلوچ ءِ کِر ءَ پہ زوال بوگ ءَ ھچ نہ منتگ، بلوچ جان ءِپرواہ ءَ نہ دار ایت ءُ یک انچیں سپرے ءَ رھادگ اِنت آئی منزل ءُ مول ساپ ءُ تچک اَنت۔
جارکش ءَ گوشتگ کہ ریاست یک جوڑ کرتگیں شونداتے ءِ پارست ءَ بلوچ چاگرد ءِ باسمائیں تواراں گوں شوربندی ءَ لگتمال کنگ ءَ اِنت دانکہ گھگیری ءِ ھمک رژانائیں چراگ ءَ بے رژن بہ کنت۔
ما گوں اکوام متھدہ، انسانی ھکانی میان استمانی گل، رسانکدری ادارہ ءُ سرجمیں جھان ءِگوں راجمستری بھرگاں لوٹ کن ایں کہ ڈاکٹر ماہ رنگ ءَ ھوار پہ درسیں سروک ءُ کارکنانی زوتیں آجوئی ءَ توار چست بہ کن اَنت، پاکستان ریاست ءِ بلوچ چکچینی شونداتانی میان استمانی تک ءَ جست ءَ بہ کن اَنت ءُ بلوچ ءِ زوریں بیگواھی ءَ انسانیت ءِ بگیری ءَ میار بہ لیک اَنت ءُپہ ایشی گر ءُ دار کنگ ءَ کردی گامگیج بزور اَنت۔
جارکش ءَ گوشتگ کہ بلوچ نیشنل موومنٹ گوں تچکیں جار ءَ گوش ایت کہ پہ بلوچ راجی آجوئی زرمبشتءَ ھمک جاہ ءَ پہ ھرپمیں دیمونی دیگ ءَ وتی پرکاریاں برجاہ دار ایت ءُ اگاں ڈاکٹر ماہ رنگ بلوچ زوت دیم ءَ آرگ نہ بوت بلوچ نیشنل موومنٹ ھمک سیاسی، سپارتی ءُ لس مردمانی راھبندانی سر ءَ شریں وڑے ءَ گھگیری تکشام بندات کنت۔
