جنیوا : بلوچ راجی زْرمبشت ( بی این ایم ) ءِ سرکماش ڈاکٹر نسیم ءَ جنیوا ءِ اھوالکاری گس ( پریس کلب ) ءَ پشتون پانک زرمبشت ( پی ٹی ایم ) ءِ نیادے ءَ تْران کنان ءَ کڈن کرتگ کہ چیردستیں راج ھم سنت بہ بہ اَنت۔ پشتون راھشوناں مادنیں گامگیج ءِ سکین دیان ءَ آئی ءَ گْوشتگ ودار ءِ باریگ آسر بیتگ ، نی آجوئی ءِ باریگ اِنت۔پشتون براتاں! چد ءُ گیش ودار مہ کن اِت۔ پہ وتی آجوئی ءَ زْرمبشت ءِ جار ءَ بہ جن اِت۔ گوں وتی بلوچ ءُ سندی براتاں دست ماں دست بہ بہ اِت پرچا کہ مئے جنگ چہ یک دومی ءَ گستا نہ اِنت — بلکیں ما یکیں زورگر ءِ بگیری ءَ جنگ ءَ ایں۔
آئی ءَ پشتون ءُ سندی راج ءِ سر ءَ بیوکیں زورگری سھرا کرتگ اَنت ءُ گْوشتگ ما داں کدی چہ اے مھترھند ءَ وتی ھکاں پنڈوک ایں ، کہ اے مارا وتی دژمن سرپد بیت ؟ ماں داں کدی اے تْرام ( نظام ) ءِ بھر مان ایں کہ پہ مئے ایرجیگ ءُ گمسار کنگ ءَ جوڑ کنگ بیتگ ؟
آئی ءَ اے نیمگ ءَ دلگوش پرینتگ کہ پاکستان چہ چیردستیں راجانی یکجاھیں توان ءَ ترس ایت ، آئی ءَ گْوشتگ پاکستان لوٹ ایت کہ ما بھر ءُ بانگ بہ بہ ایں پرچا کہ اگاں ما ھم سنت بہ بہ ایں گڑا آئی اے برجاھیں جبر ءِ تْرام شنگ ایت۔ آ چہ ھما روچ ءَ ترس اَنت کہ بلوچ ءُ پشتون کوپگ پہ کوپگ جز اَت۔ چہ ھما روچ ءَ دلترک اَنت کہ سندی ءُ ھزارہ گوں ما پجیگ ءَ مزدانک ءِ لوٹ ءَ بہ کن اَنت۔آ چہ ھما روچ ءَ ترس اَنت کہ ما ھک ءِ لوٹ ءَ یلہ بہ کن ءُ وتی آجوئی ءِ پچ گرگ ءِ گپ ءَ بہ جن ایں۔اگاں ما بھر ءُ بانگ بوتیں گڑا چیردست مان ایں ، بلے اگاں ما یک مشت بہ بہ ایں گڑا جھان ءِ ھچ توان مئے دیم ءَ داشت نہ کنت۔
راجاں رد دیگ ءِ پاکستان ءِ گْوستانک ءِ سر ءَ گپ جنان آئی ءَ شکساتگ پاکستان ءَ بھ بلوچ ، پشتون یا سندیانی سر ءَ باور نہ کرتگ ءُ ناں کہ دیمتر ءَ کنت۔ما ھمک راہ چکاس اِت — گچینکاری ، پارلیمان ، آمیدگس —بلے ھمک بر ءَ مارا ابید چہ رد دیگ ، تیر ءُ کشت ءُ کوش ءَ ھچ نہ رس اِت۔
بی این ایم ءِ سرکماش ءَ پاکستانی مھترھند چیردستیں راجانی بگیری ءَ برجاھیں چکچینی ءِ شوندات ءِ زمہ وار لیک اتگ ءُ گْوشتگ مئے درسانی بگیری ءَ پاکستان ءِ کارپد یک وڑ اَنت — کوش ، آوار ، نگٹ کنگ ، بھر کنگ۔بلے مروچی ماں جنیوا ءَ گوں یکجاھی ءَ اے کلوہ ءَ شکسایگ ءَ ایں کہ آیانی شون ءُ شور بے سوب بیتگ۔
چہ ریاست ءِ زوراکی ءَ سانمند بیتگیں مردم ءَ گوں آئی ءَ ھمدردی درشانتگ ءُ گْوشتگ مروچی ما یک کسے ءِ بستار اناں بلکیں ھمک آ بلوچ مات ءِ توار ءِ جھگیری ءَ گپ جنگ ءَ آں کہ وتی زور بیگواھیں چک ءَ شوھاز ءَ اِنت ، من ھما پشتون پت ءِ توار آں کہ پہ وتی کشگ بیتگیں چک ءَ پرسیگ اِنت ءُ ھمک سندی کھول ءِ توار ءِ بستار ءَ تْران ءَ آں کہ وتی کس ءُ مردمانی واتری ءِ ودار ءَ اَنت، من گھگیری ءِ توار آں۔
آئی ءَ بلوچستان ءِ مڈیانی لٹ ءُ پل ءِ سر ءَ درائینتگ بلوچستان ایوک ءَ لشکری زوراکی ءُ زورگری ءِ آماچ نہ اِنت بلکیں گزرانکی لٹ ءُ پل ءِ ھم نشانگ اِنت۔ مئے سھر ، رود ، گیس ءُ دگہ مڈی پلگ بیگ ءَ اَنت ءُ مئے راج نیستی ، شد ءُ نادراھیانی تہ ءَ تیلانک دیگ بیتگ ۔مھترھند بلوچستان ءَ نوک آبادی ءُ زورگپتیں سرڈگارے سرپد بیت ، انچیں سرڈگارے کہ آ اود ءَ لٹ ءُ پل کنگ بیت بلے آ اود ءِ نندوکیں مردم منگہ (عزت ) دیگ نہ بہ اَنت۔
میان راج ءِ سر ءَ شرگداری کنان آئی ءَ گْوشتگ میان راج مردمی ھکانی گپ ءَ جنت بلے پہ پاکستان ءَ اربانی ڈالر ءِ لشکری کمک دیم دنت۔ پہ انچیں لشکرے ءَ کہ گوں ھمے کمکاں بلوچ ءُ پشتونانی چکاں کش ایت۔ کس ءَ پاکستان 1971 ءِ بنگالیانی چکچینی ءِ سر ءَ جست ءُ پرس نہ کرت ، مروچی آ بلوچستان ، پشتونخوا ءُ سند ءَ برجاھیں چکچینیاں ھم نادلگوش اَنت۔مارا ھچ وڑیں بانجیگ ءُ پنڈگ نہ لوٹ ایت — ما برابری لوٹ ایں۔ما نہ لوٹ ایں کہ کسے مئے سر ءَ تورو بہ کنت—ما وتی ھکاں لوٹ ایں۔ما نہ لوٹ ایں کہ دگرانی سر ءَ واکداری بہ کن ایں—ما وتواجھی لوٹ ایں۔
