بلوچ یکجھتی کمیٹی ءِ سروک ڈاکٹر ماہ رنگ بلوچ ءَ ماں چاگردی رسانکدرایکس ءَ وتی شنگ کرتگیں درشانے ءَ گوشتگ کہ شال ءِ جاہ منندیں کمبرانی کھول ءِ ھشت مردم داں انوں پاکستانی لشکر ءُ چیریں ادارھانی دست ءَ زور بیگواہ اِنت، اے کھول ءِ بیگواه کنگ بیتگیں مردماں ورنایاں ھوار کماش ھم گوں اَنت۔ ھمک روچ گساں بیڑ برگ ءُ گس ءِ شرپ لگتمال کنگ بوگ ءَ اَنت ءُ جنین ءُ زھگاں ترسینگ ءَ ھوار آزار دیگ ءُ نشانگ کنگ ءَ اَنت۔
آئی ءَ گوشتگ کہ ریاست ءَ نہ تیوک ءَ زوراکی برجاہ داشتگ بلکیں اے کھول ءَ چوش ھم گوشگ ءَ نہ اِنت شمئے میار چے اِنت۔ ھمک روچ گسانی سر ءَ ارش کنگ ءُ زور بیگواہ کنگ ءَ اِنت، نہ ایشانی سر ءَ دگہ بھتامے ھست ءُ نہ اے راھبند ءُ کانود ءِ رد ءَ پولیس اسٹیشن یا آمیدگسے ءَ پیش کنگ بنت۔
ڈاکٹر ماہ رنگ ءَ گوشتگ کہ بلوچستان ءِ جیڑہ ءِ سر ءَ چہ بنداتی روچاں راھبند ءُ کانود کار گرگ نہ بوتگ اَنت ءُ ریاست ءَ کدی ھم راھبند ءِ شرپ نہ کرتگ، بلے داں انوں ناشری ءُ زوراکیانی نوکیں منانکے برجاہ دارگ ءَ اِنت۔اود ءَ بلوچانی گون ءَ ھما رویشت ءَ برجاہ دارگ ءَ اَنت که اے چہ پانزدہ دھک ءِ ایردستی ءَ گنتر اِنت۔
