بلوچ لبریشن آرمی ( بی ایل اے ) ءِ جارکش جیئند بلوچ ءَ ماں رسانکدر ءَ وتی شنگ کرتگیں درشانے ءَگوشتگ کہ بی ایل اے مرچی 18 مارچ ءَ درہ بولان آپریشن ءِ سوبمندیں آسری ءِ جار ءَ جنت۔ اے آپریشن دو بھرانی تہ ءَ بیتگ، بنداتی بھر پروری 2024 ءَ مچ شھر ءَ دستیگ کنگ ءِ دروشم ءَ بیتگ، دومی بھر مارچ 2025 ءَ جاپر ایکپریس ءِ سر ءَ ارش بندات کنگ بیتگ ءُ داں ھپتگے ءَ برجاہ ءُ گوں ترندیں میڑاں پد آسر بیتگ۔ اے آپریشن ءَ زورگریں پاکستانی لشکر ءَ چہ بلوچستانءِ گوستانک ءَ درساں مستریں پروش وارتگ کہ اود ءَ 354 ءَ گیش لشکری کارمند مرتگ، سد ءَ گیش ٹپی بیتگ ءُ 214 لشکری کارمند دزگیر کنگ بیتگ اَنت۔ دژمنیں لشکر ءِ تونگری ءُ جنگی بندیگانی یل نہ کنگ ءِ سوب ءَ درسیں لشکری کارمند کشگ بیتگ اَنت۔
آئی ءَ گوشتگ کہ اے آپریشن ءَ بی ایل اے ءِ سیزدہ سرمچار شھید بیتگ کہ آیانی تہ ءَ شش پدائی مجید برگیڈ، چار سرمچار پتےاسکواڈ ءُ سے ایس ٹی او ایس ءِبیتگ اَنت۔ اے شھیداں وتی جان ءِ دیمونی داتگ ءُ دژمن ءَ ھمے پیش داشتگ کہ بلوچ راجی گھگیری پروش نہ وارت زورگر زوت یا دیر ءَ چہ بلوچ سرڈگار ءَ تچ ایت۔ اے شھیدانی تہ ءَ شھید سنگت بیگ مھمد پنام تارک ھوار بیتگ آئی ءِ اے جنگی کارانی منگ ءَ بی ایل اے آئی ءَ ” سگار بلوچ ” ءِ جنگی نام ءَ دنت کہ گل ءِ دومی چہ درساں مستریں شرپ اِنت۔
جارکش ءَ گوشتگ کہ بی ایل اے وتی لشکری ءُ جنگی بودناکی ءُ چہ انٹیلی جنس ءِ گھتری ءَ بولان ءَ ابید نوشکے ءَ ھم پاکستانی لشکر ءِ ھشت گاڑیانی کاروان ءِ سر ءَ گوں تراکناکیں شورھاں پدائی ارش کرتگ ءُ سنگر گپتگ ءُ نشانگ کرتگ اَنت۔ اے ارش ءَ 90 ءَ گیش لشکری کارمند مرتگ ءُ دھانی کچ ءَ ٹپی بیتگ اَنت۔ ھمے وڑ ءَ تیوک ءَ یکیں ھپتگ ءَ بی ایل اے ءَ دژمن ءِ 354 ءَ گیش کارمند کشتگ ءُ سد ءَ گیش ٹپی کرتگ۔ یک ڈرونے جتگ کہ دژمن ءِ نوکیں لشکری ٹیکنالوجی ءِ دیم ءَ بلوچ ءِ گھگیری توان ءِ سوبمندی ءَ پیش دار ایت۔
آئی ء َ گوشتگ کہ اے آپریشن ءِ بندات یازدہ مارچ ءَ چہ جاپر ایکسپریس ءِ سر ءَ ارش ءَ بیتگ، اود ءَ بی ایل اے ءِ سرمچاراں دژمن ءِ سر ءَ کھر گورتگ سی ءَ گیش آرمی۔ ایپ سی ءُ پولیس کارمند کشتگ اَنت ءُ 214 لشکری کارمند دزگیر کرتگ۔ اے دزگیر بیتگینانی تہ ءَ ارجمنٹ ءُ یونٹانی کارمند ھوار بیتگ اَنت۔ 41 ڈویژن ءِ 45 کارمند، 17 آزاد کشمیر رجمنٹ ءِ 56 کارمند، ای ایم ای سینٹر ءِ 47 کارمند۔ 25 بلوچ ارجمنٹ ءِ 15 کارمند، 6 آرمرڈرجمنٹ ءِ 26 کارمندءُ انپٹری وانگجاہ ءِ 25 کارمند بیتگ اَنت۔
جارکش ءَ گوشتگ کہ بی ایل اےءَ کانود ءُ میان استمانی جنگی راھبندانی رد ءَ اے درسیں کارمند بلوچ ءِ گھگیری آمیدگس ءَ پیش کرتگ اَنت، اود ءَ آیانی سر ءَ بلوچ چکچینی، زوریں بیگواھی ءُ جنگی میارباریانی ھوار بوگءِ بنیاد ءَ مرگ ءِ سزا دیگ بیتگ۔
آئی ءَ گوشتگ کہ درہ بولان آپریشن ءَ بی ایل اے ءِ سیزدہ سرمچار شھید بیتگ کہ آیانی تہ ءَ پنچ مجید برگیڈءِ پدائی بیتگ اَنت ءُ نوشکے ءَ گوں تراکناکیں شورھانی ارش ءِ پدائی ءَ ھوار شش پدائیانیاں وتی جان ءِ دیمونی داتگ۔ چہ ایشی ءَ ابید بی ایل اے ءِ جنگی یونٹ پتے اسکواڈ ءِ چار نہ ترس ءُ اسپیشل ٹیکٹیکل آپریشنز اسکواڈ (ایس ٹی او ایس) ءِ سے سرمچار گوں جوانمردی ءَ جنگ ءَ شھید بیتگ اَنت۔ ھمک شھید ءِ ھون اے ماتیں سرڈگار ءِ پیشانی ءَ چک ایت، ھمک شھید ءِ دیمونی اے جھد ءَ گیش مھکم کنت ءُ آیانی ترانگ بلوچ راجدپتر ءِ تہ ءَ پہ مدامی مان اَنت۔
جارکش ءَ گوشتگ کہ شھید سنگت بیگ مھمد پنام تارک ءِ نام بلوچ راجی گھگیری ءِ ھمک سرمچار ءِ دل ءَ مدام یک رھشونے ءِ رد ءَ یاد کنگ بیت۔ بولان ءِ ھند گزبک ءِ جاہ منندیں اے مزنشانیں جنگول 2018 ءَ بی ایل اے ءَ ھوار بیتگ ءُ ءَ چہ وتی جنگی بودناکی، کارشونی ءُ سروکی ءِ کرد ءِ برورد ءَ ماں کسانیں وھدے ءَ آپریشن کمان گچین کنگ بیتگ۔ آ نہ تیوک ءَ یک جنگولے بیتگ بلکیں یک لشکری چیدگے اَت۔ آئی ءَ دژمن ءِ سر ءَ مزنیں ارش کرتگ ءُ ھمک میڑ ءَ بی ایل اے سوبمند کرتگ۔
آئی ءَ گوشتگ کہ چہ بیگ مھمد پنام تارک ءِ سروکی ءَ بی ایل اے بازیں آپریشناں سوبین بیتگ ءُ آئی چہ وتی جنگی کارشونیاں دژمن ھمک میڑ ءَ پہ پدکنز کنگ ءَ لاچار کرتگ۔ آئی ءَ نہ تیوک ءَ سلاہ کار گپتگ بلکیں دژمن ءِ بگیری ءَ جنگ ءَ نوکیں راھبند ٹھینگ بی ایل اے چہ جوانیں بودناکیاں یک نوک ءُ مزنیں جاھے ءَ سر بیتگ ءُ ھمے پیش داشتگ کہ بلوچ راجی گھگیری تیوکءَ گوں دیمپانی کاراں بندوک نہ اِنت بلکیں گوں یک سرجمیں لشکری لیکھے ءَ مٹ بیتگ۔
جارکش ءَ گوشتگ کہ درہ بولان آپریشن ءِ پڑ ءَ شھید بیتگیں چہ سرمچاراں دگہ یک بے مٹیں نامے شھید پدائی سنگت مھزام بلوچ پنام میرک اِنت، آئی ءَ نوشکے ءَ دژمنیں لشکر ءِ کاروان گوں تراکناکیں شورھانی ارش ءَ نشانگ کرتگ۔ پنجگور پروم ءِ جاہ منندیں اے نہ ترس 2021 ءَ بی ایل اے ءَ ھوار بیتگ ءُ زوت چہ وتی دلیری، دیمونی ءُ جوانمردی ءِ برورد ءَ مجید برگیڈ ءِ بھر بیتگ۔ آئی ءَ دژمن ءِ ھشت بسانی کاروان نشانگ کرتگ ءُ 90 ءَ گیش لشکری کارمند کشتگ ءُ دھانی کچ ءَ ٹپی کرتگ ءُ ھمے پیش داشتگ کہ بلوچ گھگیری دژمن ءِ کجام ھم بھر ءَ نشانگ کرت کنت۔ آ شھید پدائی شھزاد پنام کوبرا ءِ برات اَت۔ شھید شھزاد بلوچ 2020 ءَ کراچی ءَ اسٹاک ایکسچینج ءَ پدائی ارش ءَ ھوار بیتگ۔
آئی ءَ گوشتگ کہ شھید پدائی اھکام بنگلزھی پنام بادل بلوچ درہ بولان ءَ سروکیءِ پرز پیلو کرتگ ءُ وت ءَ ھمے جنگ ءَ نمیران کرتگ۔ مستونگ ءِ ھند میجر چاراہ ءِ جاہ منندیں اے نہ ترس 2021 ءَ بی ایل اے ءَ ھوار بیتگ ءُ سالے ءَ پد مجید برگیڈ ءَ ھوار بیتگ۔ آئی ارادہ ءُ دیمونی پہ بلوچ گھگیری ءَ مادنیں راہ اِنت۔
جارکش ءَ گوشتگ کہ کراچی ءِ ھند لیاری ءِ جاہ منند شھید پدائی سنگت پرویز بزنجو پنام دودا بلوچ راجی جنگءَ بے مٹیں دیمونی داتگ۔ چہ بی ایس او ءِ راھبند ءَ سیاست بندات کنوکیں اے شھزانتیں سرمچار ءَ 2022 ءَ جنگ ءِ پڑا وتی گام ایر کرتگ اَنت ءُ زوت مجید برگیڈ ءِبھرے بیتگ ءُ زوت دژمن ءِ سر ءَکھرے جوڑ بیتگ۔آئی دیمونی ءَ ھمے پیش داشتگ کہ آجوئی جنگ نہ تیوک ءَ گوں توپک ءَ بندوک اِنت بلکیں گوں ارادہ، دیمونی ءُ لیکہ ءَ کٹگ بیت۔
آئیءَ گوشتگ کہ درہ بولان آپریشن ءِ تہ ءَ شھیدانی لڑ ءَ شھید پدائی سنگت زپر بلوچ پنام منان ءِ نام ھم پہ مدامی نمیران بیتگ۔ کراچی ءِ ھند ماڑی پور ءِ جاہ منندیں بے مٹیں سرمچار 2022 ءَ بی ایل اے ءَ ھوار بیتگ ءُ زوت چہ وتی جنگی بودناکی ءُ مھکمیں ارادہ ءِ سوب ءَ مجید برگیڈ ءِ بھر بیتگ۔ آ انچیں جوانمردے اَت کہ آئی دژمن ءِ بگیری ءَ وتی توکل، دلیری ءُ جنگی کارشونی انچو کارگپتگ اَنت کہ آئی زرمبش داں دژمنءِ بنجلاں اش کنگ بیتگ اَنت۔ آئی ھمک ارش پہ دژمنءَ نوکیں تباھی یے بیتگ ءُ ھمک کارشونی ءَ بی ایل اے ءَ توان گیش کرتگ۔
جارکش ءَ گوشتگ کہ ھمے وڑ ءَ شھید پدائی سنگت یاسر پنام شاویز بولانی ءَ وتی جان ءِ دیمونی داتگ ءُ بلوچ راجی جھد ءَ را یک نوکیں توانے بکش اتگ۔ ھزدار ، چمگ زھری ءِ جاہ منندیں سرمچار 2022 ءَ بی ایل اے ءَ ھوار بیتگ ءُ 2023 ءَ چہ وتی نہ ترسی ءِ سوب ءَ مجید برگیڈ ءَ بھر زرتگ۔ آئی ءِ تہ ءَ ھما درس بوتگ اَنت یک پدائی جنگولے ءِ تہ ءَ بنت۔
آئی ءَ گوشتگ کہ شھید یاسر بلوچ ءِ شھیدی یک نوکیں توکلے ءِ چیدگ اِنت کہ بی ایل اے ءِ ھمک سرمچار ءَ اے جنگ ءَ گوں ترندی ءَ مڑگ ءِ سکین ءَ دنت۔ آئی داں گڈی دمان ءَ دژمن ءِ گون ءَ مڑ اتگ ءُ وتی جان ءِ دیمونی داتگ ءُ دژمن ءَ را پیش داشتگ کہ بلوچ سرڈگار ءِ سر ءَ زورگپتی داں دیر ءَ برجاہ نہ بیت۔
جارکش ءَ گوشتگ کہ شھیدانی ھمے گرانبھائیں لڑ ءَ شھید پدائی سنگت اسامہ امر پنام سلال ءِ نام پہ مدامی گوں شریں دانکاں بیسگ بیت۔ مستونگ ءِ ھند اسپیت بلندی، لاکی ءِ جاہ منندیں اے بے مٹیں سپاھی 2022 ءَ بی ایل اے ءَ ھوار بیتگ ءُ پہ وتی جان ءِ دیمونی ءَ 2024 ءَ واھشت پیش کرتگ۔
آئی ءَ گوشتگ کہ بی ایل اے ءِ جنگی یونٹ پتے اسکواڈ ءُ ایس ٹی ایس او ءِ شھید گوستانک ءِ تہ ءَ پہ مدامی گیر آرگ بنت۔ شھید سنگت شکیل ساتکزھی پنام زورین نہ ترسیں چیرجنگے اَت، آئی شال ءِ ھند ڈگاری ءَ شھری چیرجنگ ءَ پد کوھی جنگ ءَ دژمن ءِ سر ءَ مزنیں میڑاں ھوار بیتگ۔
جارکش ءَ گوشتگ کہ ھمے وڑ ءَ شھید سدام جان پنام ودود بولان ءِ ھند ڈاڈر ءَ پیسر ءَ شھری چیرجنگی کرتگ ءُ دژمن ءِ بگیری ءَ کاروائی کرتگ ءُ رند ءَ کوہ ءَ شتگ ءُپہ دژمن ءَ ترسے بیتگ۔
آئی ءَ گوشتگ کہ شھید سنگت پرید پنام سگیر جان واشک ءِ جاہ منند اَت آئی پیسر ءَ شال ءَ شھری چیرجنگی کرتگ ءُ رند ءَ کوہ ءَ شتگ ءُ دژمن ءِبگیری ءَ ٹوھیں ارشاں کرد پیلو کرتگ۔
جارکش ءَ گوشتگ کہ شھید ائید مھمد پنام شاہ پھد ھمانہ ترسیں سرمچار اَت کہ آئی چہ ورنایانی آجوئی ءِ سپر ءَ پہ وت ءَ جاھے جوڑ کرتگ۔ شال بروری ءِ جاہ منندیں اے سپاھی 2024 ءَ بی ایل اے ءَ ھوار بیتگ ءُ بی ایل اے ءِ جنگی یونٹ پتے اسکواد ءِ بھر بیتگ۔
آئی ءَ گوشتگ کہ شھید سنگت دیدگ پنام کمبر کہ تربت ءِ ھند ملائی بازار ءِ جاہ منند اِنت بی ایل اے ءِ اسپیشل ٹیکٹیکل آپریشنز اسکواڈ (ایس ٹی او ایس) ءِ نہ ترسیں سپاھی یے بیتگ۔ 2021 ءَ بی ایل اے ءَ ھوار بیتگ۔
آئی ءَ گوشتگ کہ شھیدانی لڑ ءَ سنگت جما پنام مھران ھم ھوار اِِنت کہ آ بولان ءِ ھند پیر اسمائیل ءِ جاہ منند اِنت۔ آ 2023 ءَ بی ایل اےءَ ھوار بیتگ۔ پیسرءَ شھری چیرجنگیءَ دژمن ءِ بگیری ءَ کاروائیاں ھوار بیتگ۔
جیئند بلوچ ءَ گوشتگ کہ اے درسیں شھید چہ بنیاد ءَ بی ایل اے ءِ اَنت، آیانی دیمونی اے جھد ءَ گیش توانمند کن اَنت۔ بی ایل اے آیانی دیمونیاں بے ھال نہ کنت ءُ آیانی ھون ءُ دیمونیانی سر ءَ کول کن ایں کہ بلوچ ءِ اے جنگ داں گڈی سوبمندی ءَ برجاہ بیت
