بلوچ نودربر گل ( آزاد ) ءِ پیسرگیں سرکماش زاھد ءُ کستریں کمک سرکارگشاد اسد ءَ یازدہ سال اِنت کہ زور بیگواہ اَنت۔ چیئرمین زاھد ءِ کھول یکردی ( یک رِد ، اجتماعی ) ڈنڈ دیگ بیگ ءَ اِنت۔میان استمانی واک مردمی ھکانی لپاشگ ءِ بگیری ءَ مئے کش ءَ بہ اوشت اَنت۔
اے گپ بلوچ راجی زْرمبشت ( بی این ایم ) ءِ جارکش ءَ بی ایس او آزاد ءِ پیسرگیں سرکماش زاھد ءُ کستریں کمک سرکارگشاد اسد ءِ یازدہ سالی ئیں زور بیگواھی ءُ گوں زاھد ءِ کھول ءَ بیتگیں انیگیں دلرنج کنوکیں ویل ءِ سر ءَ درشانتگ اَنت۔
جارکش ءَ گْوشتگ زاھد پاکستانی لشکر ءَ 18 مارچ 2014 ءَ آوار جنگ ءَ پد داں مروچیگ ءَ زور بیگواہ کرتگ۔اے کار ترندیں رنگے ءَ ریاستی ناشرکاری ءِ درانگاز ءُ یکردی ڈنڈ دیگ ءِ دْرچ ءِ بھر اِنت کہ بلوچ راج چہ بازیں سالاں ایشی ءِ آماچ اِنت۔
جارکش ءَ شاہ جھان ءِ شھیدی ءِ پد ءَ درائینتگ اے یکردی ڈنڈ ءِ بدتریں درورے۔آ 14 مارچ ءَ ماں نال ءَ پاکستان ءِ پلہ مرزی ءَ کارکنوکیں کشندھانی دست ءَ گوں بے دردی ءَ کشگ بیتگ۔آ وتی کھول ءِ تیوکیں لاپ دیوک ءُ وتی دمگ ءَ کار ءُ روزگار ءَ دزگٹ اَت۔
جارکش ءَ گْوشتگ آیانی کستریں برات سلیم بابل ، کہ بی این ایم پرکاریں باسکے ، ھم پہ درانڈیھی ءَ لاچار کنگ بیتگ ءُ آ انی ماں برتانیا ءَ باھوٹی لوٹوک اِنت۔جھان ءَ دلگوش گْور کنگ لوٹ ایت کہ اے زوراکی ءُ مھترھندی شونداتانی پد ءَ کھول درانڈیھ ءُ چہ یک دومی ءَ سندگ بیگ ءَ اَنت۔
زور بیگواھیں نودربر راھشونانی یلہ کنائینگ ءَ مزنیں رنگے ءَ زھرشانی ءُ شدکشیں زھرشانی کنگ بوت۔ اے زھرشانی اے مسام ءِ سر ءَ آسر کنگ بوت اَت کہ زور بیگواھیں نودربر راھشون پیش دارگ بہ اَنت بلے ھما مسامانی چک ءَ داں مروچی گامگیج زیرگ نہ بیتگ۔ مروچی آیاں یازدہ سال اِنت کہ پاکستان ءِ چیریں زنداناں آزار سگگ ءَ اَنت۔ آیاں مزدانک ( مُزادنک ، انصاف ) رسگ پہ جاہ ، زاھد ءِ کھول ءِ والینوکیں برات شاہ جھان کشگ بیتگ ، اے کوش ھمے کھول ءُ بلوچ راج ءِ سر ءَ برجاھیں آزار ءُ زوراکیانی مزنیں چیدگے۔
ما چہ میان راجی تْرامگیجاں دزبندی کن ایں کہ شاہ جھان ءِ کوش ءُ زاھد ءُ اسد ءِ یازدہ سالی ئیں زور بیگواھی ءِ پجیگ ءَ دگہ ھزاراں زور بیگواھیانی پٹ ءُ پول کنگ بہ بیت ءُ پاکستان اے زوراکیانی سر ءَ جست ءُ پرس کنگ بہ بیت۔میان راج مردمی ھکانی اے مزنیں بگیریانی سر ءَ مئے کش ءَ بہ اوشت ایت۔
