جنیوا : اکوام متھدہ ءِ انسانی ھکانی پنجاہ ءُھشتمی نیاد ءَ بلوچ نیشننل موومنٹ ءِ انسانی ھکانی ادارہ پانک ءِ رھوتدار جمال بلوچ ءَزوریں بیگواھی، درکانودی کوش ءُ پاکستانی لشکر ءِ نیمگ ءَ مردمانی بازیں کچے ءَلڈ ینگءُ زوراکیانی بابت ءَ تران کرتگ ءُ گوشتگ کہ چین، (چین-پاکستان اقتصادی راہداری ) سی پیک ءِ رد ءَ بلوچستان ءِ مڈیانی لٹ ءُ پل ءَ ھوار اِنت۔
آئی ءَ گوشتگ کہ من پہ بلوچستانءَ برجاھیں انسانی ھکانی لگتمالی ءِ بابت ءَ زوتیں دلگوش ءِ دیگ ءَ ساڑی آں کہ اود ءَ زوریں بیگواھی، درکانودی کوش ءُ بازیں کچے ءَ مردمانی زور لڈینگ یک دودے جوڑ بیتگ۔
جمال بلوچ ءَگوشتگ کہ لس بلوچ پاکستان ءِ نیمگ ءَ ترندیں زوراکیانی دیمپان اَنت۔ اود ءَ پہ آجوئی ءُ بنیادی ھکانی لوٹ ءَ کارکن، اھوالکار ءُ لس شھری ترندیں زوراکیانی آماچ کنگ بنت۔
آئی ءَ گوشتگ کہ پہ دیمروئی ءِ نام ءَ بلوچستان یک لشکری زونے جوڑ کنگ بیتگ ءُ اود ءِ جاہ منند پہ زور لڈینگ بوگ ءَ اَنت۔
