شال: پاکستانی چیریں اداره ءُ سی ٹی ڈی ءِ کارمنداں دوشی چه کلی کمبرانی ءَ بلوچی زبان ءِ گشنده نوشین کمبرانی ءِ برات ناسر کمبرانی آوار جتگ ءُ بیگواه کرتگ.
بنشون ءِ رد ءَ ناسر ءِ زوربیگواھی ءِ گپ آئی ءِ گھار نوشین کمبرانی ءَ راست کرتگ ءُ گوشتگ که دوشی ادار دو ءُ نیم ءَ چیریں اداره ءُ سی ٹی ڈی ءِ کارمنداں کلی کمبرانی ءَ مئے گس ءَ بیڑ برتگ ءُ منی برات ناسر کمبرانی زورانسری آوار جتگ ءُ گوں وت برتگ. چه اِے زوراکی ءَ ما سک پریشان اِیں ءُ آئی ءِ بابت ءَ مارا ھچ وڑیں سرپدی دیگ نه بیتگ.
نوشین کمبرانی ءَ گوں بلوچ راج ءُ انسانی ھکانی گلاں ناسر کمبرانی ءِ زوریں بیگواھی ءِ بگیری ءَ توار چست کنگ ءِ لوٹ کرتگ ءُ گوشتگ که زوریں بیگواھی درکانودی ءُ درانسانی کارے ءُ بائد اِنت که زوت بند کنگ به بیت.
چوش که ناسر کمبرانی یکبرے 20 اگست 2015 ءَ ھم پاکستانی لشکر ءَ آوار جتگ ءُ بیگواه کرتگ ات که 2018 ءَ سے سال زوریں بیگواھی ءَ پد چه پاکستانی لشکر ءِ آزارجاھاں آجو بوتگ ات.
