پنجگور: زوربیگواهیں جمیل اھمد ء مھمد الی ءِ کھول ءَ پنجگور پریس کلب ءَ پریس کانپرس کرتگ ءُ گوشتگ کہ جمیل اھمد 9 دسمبر 2024 ءَ گاڑی ءَ سواریں پجار نه بیتگیں مردماں چه گس ءِ دیم ءَ آوار جتگ ءُ بیگواه کرتگ ءُ انگت ءَ بیگواه اِنت ، چه ایشی ءَ سرجمیں کھول گم ءُ سسائی آزارانی دیمپان اِنت.
کھول ءِ گوشگ اِنت که جمیل ءِ بیگواه کنوکیں مردماں آئی ءِ نمبر ءِ پارست ءَ مئے گون ءَ رھوت کرتگ ءُ باج لوٹ اِتگ ، ما اِے گپ تچک ءَ پولیس ءَ ھال داتگ بلے آیاں مئے گون ءَ وتی نادزرسی پیش کرتگ. جمیل اھمد ءِ یل کنگ ءِ زمه دار پولیس ءُ انتزامیه اِنت، آ اِے کیس ءِ بابت ءَ گھتریں گامگیج زرت کن اَنت بلے گامگیج زورگ ءِ جاه ءَ وتی اوتاگاں نشتگ اَنت ءُ وت ءَ چه اے کیس ءَ دور داشتگ اِش ءُ ما گوں لاچاری ءَ دگانی سر ءَ درکپتگ ءُ زھرشانی کنگ ءَ اِیں.
کھول ءَ گوشتگ که ھمے بابت ءَ ما پولیس ءُ انتزامیه ءَ دو روچ وھد دے اِیں که جمیل اھمد ءَ آجو به کن اَنت اگاں نه ما دوشمبے ءِ بیگاه ءَ سی پیک دگ ءَ بند اِیں ءُ زھرشانی کن اِیں.
کھول ءِ گوشگ اِنت که لھتیں نشانی مارا دزکپتگ ءُ آ ما پولیس ءِ سروگان ءَ داتگ اَنت لھتیں زمه واری پولیس ءِ انتزامیه ءِ سر ءَ اِنت چے ءَ که آ په لس مھلوک ءِ جان ءُ مال ءِ پاسپانی ءَ نشتگ اَنت، جمیل اھمد ھم ھمے ملک ءِ یک شھری یے که بیگواه کنگ بیتگ چه ایشی ءَ سرجمیں کھول گم ءُ جنجالانی دیمپان اِنت.
