شال : پہ زور بیگواھیں مردمانی پد جنگ ءَ وی بی ایم پی ءِ زھرشانی گدان ءَ 5760 روچ سرجم بیتگ۔ آدینگ ءِ روچ ءَ چہ بولان ءَ سیاسی ءُچاگردی کارکن شیردل بلوچ، ھکیم بلوچ ءُ آدگہ مردم پہ ھمدردی درشان کنگ ءَ گدان ءَ اتکگ اَنت۔
وی بی ایم پی ءِ کمک سرکماش ماما کدیر گوں مردماں تران کرتگ ءُ گوشتگ کہ پاکستان ریاست بلوچستان ءَ جنگ ءِآس ءَ گیشتر مزن کنگ ءَ اِنت ءُ نوں چہ اے آس ءِ کُشگ ءَ ابید ریاست گیشتر زوراکی کنگ ءَ اِنت۔ چہ ایشی نہ تیوک ءَ جاورھراب بوگ ءَ اَنت بلکیں انسانی ھکانی پادمالی ھمک روچی دودے جوڑ بیتگ۔
آئی ءَ گوشتگ کہ ھمبلان ءَ پہ وتی مردمانی پھریزگ ءَ شوربندی ٹھینگ لوٹ ایت، چی ءَ کہ بلوچستان ءَ زوریں بیگواھی ھمک روچ برجاہ اِنت۔
آئی ءَ گوشتگ کہ پاکستان بلوچانی گون ءَ چو ایردستانی وڑ ءَ کنگ ءَ اِنت ءُ اے جاوربرجاہ بوت اَنت گڑا بلوچ چہ وشھالی ءَ زبھر بیت۔ بلوچستان ءَ چہ پاکستانی لشکرءِ زوراکی ءُ بیڑ برگ ءَ بازیں کھولاں لڈ ءُ بار کرتگ ءُ کراچی ءُ آدگہ شھراں باھوٹی زند گوازینگ ءَ لاچار اَنت، بلے ریاستی لشکر آیاں ھمودا ھم ایمن بوگ ءَ نیل اَنت ءُ آ زوراکی ءُ زوریں بیگواھی ءِ دیمپان اَنت۔
