بلوچ لبریشن آرمی ( بی ایل اے ) ءِ جارکش جیئند بلوچ ءَ ماں رسانکدر ءَ وتی شنگ کرتگیں درشانے ءَ گوشتگ کہ پاکستانی لشکر ءِ جارکش آئی ایس پی آر ءِ ٹاپار دروگ ءُ پروش ءِ چیر دیگ ءِ بے سوبیں جھد اِنت۔ زمینی راستی ھمیش اِنت کہ جنگ انگت ءَ بازیں پڑاں برجاہ اِنت ءُ دژمن ءَ سکا جانی ءُ لشکری تاوان بیتگ۔ زورگریں لشکر نہ جنگجاہ ءَ سوبین بیتگ ءُ نہ وتی بندیگیں کارمندانی پھریزگءَ سوبین بیتگ۔
آئی ءَ گوشتگ کہ ریاست پاکستان ءُ آئی پندل ساز ھما مردمانی آجو کناھینگ ءِ ٹاپار ءَ جنگ ءَ اَنت راستی ھمیش اِنت کہ بی ایل اے ءَ چہ وتی جنگی دودمان ءُ میان استمانی راھبندانی رد ءَ وت یل داتگ اَنت۔ چہ ایشی ھمے پدر اِنت کہ پاکستانی لشکر ءَ داں انوں وتی بندیگیں کارمند بندیگجاہ ءَ یل داتگ اَنت ءُ تیوک ءَ پندل سازی ءِ پارست ءَ وتی پروش ءِ چیردیگ ءِجھد ءَ کنگ ءَ اِنت۔
جارکش ءَ گوشتگ کہ جنگ انگت ءَ گوں ترندیءَ برجاہ اِنت ءُ سرمچار ھمک پڑاں دژمن ءَ پہ پدکنز کنگ ءَ لاچار کنگ ءَ اَنت۔ پروش وارتگیں لشکر ءَ زمینی جنگ ءِ بے سوبی ءَ پد ھندی بلوچ آبادیانی نشانگ کنگ بندات کرتگ دانکہ وتی لشکری نادزرسی ءِ بیر ءَ چہ کودکیں شھریاں بہ گیت۔
آئی ءَ گوشتگ کہ بی ایل اے ءَ پہ جنگی بندیگانی جیڑہ ءِ سر ءَ پاکستان ریاست موہ داتگ کہ آ سنگین بہ بیت پہ بندیگانی آجو کناھینگ ءَ گامگیج بزور ایت بلے چہ زورگریں لشکر ءَ وتی سپاھیانی پھریزگ ءَ ابید جنگی گنوکی گندگ بوگ ءَ اِنت۔ وھدے کہ ریاست وتی بندیگاں پہ مرگ ءَ یل کنگ ءَ اِنت گڑا آیانی مرگ ءِ زمہ واری آئی وتی سر ءَ بیت۔
جارکش ءَ گوشتگ کہ بی ایل اے پہ زمینی راستی ءِ منارینگ ءَ پاکستان ءَ چیلنج کنت۔ اگاں زورگریں لشکر راستے سوبمندی ءِ ٹاپار جنت گڑا اھوالکاراں آجو بہ کنت ءُ تچکیں بنشوناں جنگ آماچیں ھند ءَ دیم بہ دنت دانکہ جھان بہ گند ایت کہ پاکستانی لشکر راستی ءَ گوں کجام تاواناں دیمپان اِنت۔
جیئند بلوچءَ گوشتگ کہ اے جنگ چہ پاکستان ریاست ءِدست ءَ درآتکگ، ھمک پڑاں دژمن پروش ورگ ءَ اِنت ءُ بی ایل اے وتی شرتانی بنیاد ءَ اے جنگ ءِ داں گڈی آسر ءَ سر کنگ ءَ وتی سرجمیں تاوان ءَ چکاسگ ءَ اِنت۔
