کیچ: چہ تُربت لا وانشجاہ ءَ پاکستانی لشکر ءِ دست ءَ زوربیگواہ کرتگیں سئید اھمد ءِ کھول ءَ یک رندے پد ءَ تجابان، کرکی ءَ زھرشانی ءَ سی پیک دگ بند کرتگ ءُ نشتگ اَنت۔
زوربیگواھیں سئید اھمد ءِ کھول پیسر ءَ ھم یک رندے زھرشانی ءَ نشتگ اَت ءُ کمک دمگدار ءَ دلجمی داتگ اَت کہ سئید اھمد ءَ دو روچ ءِ تہ ءَ آجو کنگ بیت، بلے آئی گپ دروگ بیتگ اَنت۔ مرچی چارمی روچ اِنت کہ سئید اھمد ءِ انگت ھچ ھال نیست۔
سئید اھمد ءِ کھول ءَ گوشتگ کہ داں کہ سئید اھمد آجو کنگ نہ بوتگ ما سی پیک دگ ءَ پچ نہ کن ایں۔ داں مرچی شپ ءَ اگاں سئید یل کنگ نہ بوت دوازدہ مارچ ءَ تربت ءَ لا وانشجاہ ءِ دروازگ ءِ دپ ءَ زھرشانی ءَ نندیں۔
چوش کہ سئید اھمد ء نیک بھت پنچ مارچ ءَ پاکستانی لشکر ءَ چہ تربت ءَ لا وانشجاہ ءَ ھما وھد ءَ آوار جتگ اَت کہ آ وتی کار ءِ سر ءَ بوتگ۔
