بلوچستان لبریشن پرنٹ ( بی ایل ایپ ) ءِ جارکش میجر گھرام بلوچ ءَ ماں رسانکدر ءَ وتی شنگ کرتگیں درشانے ءَ گوشتگ که بی ایل ایپ ءِ سرمچاراں چار جتائیں کاروائیاں آواران ءَ دگ جوڑ کنوکیں شرکت ءِ میشن ءُ سامان مانداشتگ اَنت ، کیچ ءَ سی پیک دگ بستگ، زامران ءَ موبائل ٹاورے مانداشتگ ءُ تمپ ءَ زورگریں پاکستانی لشکر نشانگ کرتگ۔
آئی ءَ گوشتگ که ھپت مارچ ءَ شپ ءِ ھشت ءَ بی ایل ایپ ءِ سرمچاراں آواران ءِ ھند کنیره ءَ دگ کار کنوکیں شرکت ءِ سر ءَ اُرش کرتگ ءُ آئی ءِ مشین ءُ گاڑی مانداشتگ ءُ تباه کرتگ انت۔
جارکش ءَ گوشتگ که ھشت مارچ ءِ شپ ءَ دگه یک کارے ءَ بی ایل ایپ ءِ سرمچاراں کیچ ء ھند ھیرونک ءُ تجابان ءِ میانجی ءَ سی پیک دگ ادار ھپت ءَ داں نو ءَ بستگ ءُ گاڑی پٹ ءُ پول کرتگ اَنت. ھمے میان ءَ لیویز کارمند گوزگ ءَ بیتگ انت بلے سرمچاراں ھچ وڑیں تاوان نه داتگ اَنت.
آئی ءَ گوشتگ که نو مارچ ءِ شپ ءِ ھشت ءَ سرمچاراں کیچ ءِ ھند زامران ءَ په چاریگی ءَ جتگیں موبائل ٹاورے ءِ مشین ءُ سامان مانداشتگ ءُ تباه کرتگ اَنت۔
جارکش ءَ گوشتگ که ھمے شپ ءَ ادار ھپت ءُ نیم ءَ سرمچاراں کیچ ءِ ھند تمپ کلات ءَ زورگریں پاکستانی لشکر ءِ چوکی ءِ سر ءَ گرنیڈ لانچر ءِ باز گولا آس داتگ که گولا چوکی ءِ ته ءَ کپتگ اَنت ، چه ایشی ءَ لشکر جانی ءُ مالی تاوان ءِ دیمپان بیتگ.
میجر گھرام ءَ اِے اُرشانی زمه واری من اِتگ ءُ گوشتگ که داں زورگریں لشکر ءِ سرجم ءَ درآھگ ءَ کاروائیانی برجاہ دارگ ءِ کول ءَ کن اِیں۔
