مستونگ / کلات: پاکستانی لشکر ءِ دست ءَ زوربیگواھیں مردمانی کھولانی زھرشانی نندانک باز روچ اِنت که شال کراچی ءُ شال تپتان ءَ شھدگ ءَ برجاه اِنت۔
بنشون ءِ رد ءَ مستونگ کردگاپ ءَ سرپره ٹک ءِ مردماں پہ وتی آزیزانی زوریں بیگواھی ءِ بگیری ءَ شش روچ اِنت که شال ءِ نزیک ءَ شال تپتان شھدگ ءَ زھرشانی ءَ نشتگ اَنت۔ چه ایشی ءَ شال تپتان شھدگ سرجم ءَ بند اِنت زھرشانی کنوکانی گوشگ اِنت که داں مئے آزیزانی آجوئی ءَ زهرشانی برجاه بیت.
دومی نیمگ ءَ گوستگیں روچاں کلات ءَ پاکستانی لشکر ءِ دست ءَ زوربیگواھیں سی ءُ پنچ مردمانی کھولاں سے روچ اِنت که کلات ءِ نزیک ءَ شھدگ بند کرتگ ءُ زھرشانی کنگ ءَ اَنت.
چه بیگواھیں مردماں گوستگیں روچ ءَ ھشت مردم پولیس ءِ دست ءَ دیگ ءُ لس مھلوک ءِ دیم ءَ پیش کنگ بیتگ اَنت بلے کھول گوشگ ءَ اَنت دانکہ سرجمیں زوربیگواھیں مردم دیم ءَ آرگ نه بنت مئے زھرشانی برجاه اِنت. ھمے میان ءَ کھول ءُ بی وائی سی ءَ گوں انتزامیه ، دمگدار ءُ ایس پی ءَ تران کرتگ.
زوربیگواھیں مردمانی کھولاں گوں انتزامیه ءَ تران کرتگ ءُ وتی لوٹ پیش کرتگ اَنت که پاکستانی ایپ سی ءِ بگیری ءَ ارزی نبیسگ به بیت ءُ بیگواھیں مردم داں بیست ءُ چار ادار ءَ یل کنگ به بنت.
کھولاں گوشتگ که اگاں مئے مردم داں بیست ءُ چار ادار ءَ یل کنگ نه بنت ما وتی زھرشانی ءَ گیش ترند کن ایں ایشی ءِ زمه وار ریاست، بلوچستان سرکار ، کلات ءِ انتزامیه ءُ سرکار ءَ سر ءَ اِنت۔
کھولاں گوں بلوچ ءَ لوٹ کرتگ که مئے کمک به بنت ءُ زھرشانی ءَ بلوچستان ءِ آدگه جاھاں برجاه دار اَنت ءُ دگ بند کنگ به بنت.
