بلوچ یکجھتی کمیٹی ءِ جارکش ءَ ماں رسانکدر ءَ وتی شنگ کرتگیں درشانے ءَ گوشتگ کہ بلوچ زور بیگواھیں مردمانی کھول ءِ زھرشانی نندانک گوستگیں سے روچ بیت کہ بوانی ءَ برجاہ اِنت۔ اود ءَ شش زور بیگواھیں مردمانی کھول پہ وتی آزیزانی آجوئی ءَ زھرشانی کنگ ءَ اَنت۔ ریاستی انتزامیہ نہ زور بیگواھیں مردمانی آجوئی ءَ سوبمند بیتگ ءُ نہ ریاستی لشکر ءِ بگیری ءَ کا نودی کاروائی کنگ ءَ جاڑیگ اِنت۔ چہ ایشی ءَ سانمندیں کھول پہ گپ ءُ تران ءِ نامءَ ترسینگ بوگ ءَ اَنت۔
آئی ءَ گوشتگ کہ مرچی سھبءَ ریاستی داراہ ءُ سادگ پوشاکیں چیریں ادارھانی کارمنداں زھرشا نی کنوکانی سرءَ بیڑ برتگ، چہ ایشی ءَ مرد ءُ جنین رستری زوراکیانی نشانگ کنگ بیتگ اَنت۔ زھرشانی کنوکانی سر ءَ تیرگواری کرتگ ءُ لٹ شاپ کرتگ اَنت۔ ھمے میان ءَ باز مردم دزگیر کنگ ءَ پد چیریں بندیگجاھے ءَ برتگ اَنت۔ آیانی تہ ءَ زور بیگواھیں شبیر بلوچ ءِ گھار سیما بلوچ، راشد بلوچ ءِ برازتک ماہ زیب بلوچءُ زپر گیشکوری ءِ پیرزالیں مات ءَ ھوار دگہ باز جنین گون اَنت۔
آئی ءَ گوشتگ کہ سانمندیں کھول وتی گپ ءِ سر ءَ اوشتاتگ اَنت ءُ وتی آزیزاں ژانگولیں لاشانی دروشم چگل دیگ یا ریاستی ادارھاں دروگیں میڑاں کشگ ءَِ موکل دیگ ءَ رازیگ نہ اَنت۔ چہ گیشیں ریاستی زوراکی ءُ دزگیریاں ابید نندانک انگت ءَ برجاہ اِنت۔ بی وائی سی ھمے کول ءَ کنت کہ آ اے جھد ءَ زور بیگواھیں مردمانی کھولانی گون ءَ اوشتاتگ ءُ سرجمیں بلوچ راج ءَ ھوار گوں کراچی ءُ ھب ءِ لس مردماں لوٹ کنت کہ آ زوت ھب نندانک ءَ وت ءَ سر بہ کن اَنت۔
آئی ءَ گوشتگ کہ ما ریاست ءَ تچکءَ گوش ایں کہ کودکیں زھرشانی کنوکانی لٹ شاپ ءُ بلوچ جنینانی دزگیری ءَ ھچ وڑ ءَ نہ من ایں۔ ما ھب انتزامیہ ءَ کڈن کن ایں کہ آ دزگیرکرتگیں مردماں گوں جنینانی ھواریءَ زوت یل بہ کنت ، اگاں نہ ما زوت آھوکیں گامگیج ءِ جار ءَ جن ایں۔ ایشی درسیں زمہ واری ریاست ءُ ھب انتزانیہ ءِ سر ءَ بنت۔
