بلوچ وومن پوم ءِ سرکماش ڈاکٹر شلی بلوچ ءَ ماں چاگردی رسانکدر ءَ وتی شنگ کرتگیں درشانے ءَ گوشتگ کہ مروچی بلوچ زانت کہ ھُشک ءَ نندگی نہ اِنت بلکیں زوراکی ءِ بگیری ءَ گَھگیری کنگی اِنت۔ پرچاکہ گَھگیری زندمان اِنت، بلوچستان ءِ بازیں دمگاں گار ءُ بیگواھیں مردمانی کھولانی زھرشانی ءُ ننداک برجاہ اَنت، ھب ءَ ننداک ءِ سر ءَ اُرش کنگ بیتگ مردم لٹ ءُ کُٹ کنگ بیتگ اَنت ءُ ھشت زالبول ءَ ھوار بازیں مردین ھم زندانی کنگ بیتگ اَنت،اے در انسانی کارے من ایشی ایر نہ جناں چے ءَ که نوں ایر جنگ مئے ھچ درد ءِ دواہ نہ اِنت بلکیں من گوں بلوچ راج ءَ دزبندی کناں کہ کرد ءِ پڑ ءَ بیا اَنت یکجاہ ءُ یکمشت بہ بنت گڑا ما اے زوراکیانی دیم ءَ داشت کن ایں۔
آئی ءَ گوشتگ کہ یکیں دو ماہ ءِ تہ ءَ دو سد بلوچ ءَ گیش گار ءُ بیگواہ کنگ ءُ بازیں بلوچ ءِ کُشگ ءُ نشانگ کنگ اے گپ ءَ پدّر کنگ ءَ اِنت کہ ریاست پد ءَ یک ترس ءِ چاگردے ودی کنگ لوٹگ ءَ اِنت۔ بلے مارا ترس ءِ آماچ بوگی نہ اِنت بلکیں زانت ءِ بنیاد ءَ زوراک ءِ دیم دارگی اِنت۔
