بلوچ راجی آجوئی سنگر (براس) ءِ جارکش بلوچ ھان ءَ ماں رسانکدر ءَ وتی شنگ کرتگیں درشانے ءَ گوشتگ کہ براس ءِ بنجاہ ءِ نیمگ ءَ یک دیوانے برجم دارگ بیتگ۔ ایشی ءَ ھم سنتیں گلاں بلوچ لبریشن آرمی، بلوچستان لبریشن پرنٹ، بلوچ ریپبلکن گارڈز، ءُ سندھی آجوئی لوٹوکیں گل سندھو دیش ریولوشنری آرمی ءِ بنجاھی اگدہ داراں بھر زرتگ۔اے دیوان داں سے روچ ءَ برجاہ بیتگ، ایشی تہ ءَ پہ بلوچ راجی رزمبشت ءَ یک جوانیں بھرے ءِ نیمگ ءَ برگ ءَ گچینیں سوڑگ کنگ بیتگ۔
آئی ءَ گوشتگ کہ اے دیوان ءَ ھمے گپ ءِ سر ءَ تپاک کنگ بیتگ کہ براس زوت یک راجی لشکرے جوڑ کنگ بیت۔ جتائیں گلانی جھدکار ءُ سروکاں یک جوانیں لشکری گلے ءِ بنیاد ءَ پہ ھوار کنگ ءَ بنجاہ ءِ نیمگ ءَ نوکیں پتر ءُ ادارہ ٹھینگ بیت۔ وھدے کہ جھل ءِ درسیں دمگاں گل ءُ جنگی بنیاد ءَ مھکم ءُ نوکیں ھمگرنچی ءِ کار زوت بندات کنگ بیت۔ اے کار ءِ بنیادی مول بلوچ گھگیری ءِ توانمندی چہ جتائیں کاروائیاں کشگ ءُ یک مھکم ءُ جوانیں توانے ءَگوں مٹ کنگ اِنت۔ اے پہ دژمن ءِ پروش دیگ ءَ یک جوانیں کار ےزانگ بہ بیت۔
آئی ءَ گوشتگ کہ اے دیوان ءَ ھمے سوڑگ کنگ بیتگ کہ پاکستان ءُ چین ءِ بگیریءَ جنگ ترند ءُ نوک کنگ بیت۔ چیرجنگی کاروائی نوکیں لشکری کارشونی ءِرد ءَ مھکم کنگ بنت دانکہ دژمنءَ گیش تاوان بہ رس ایت۔ وھدے کہ جنگ ءِ پڑا ٹیکنالوجی ءِ شر کار گرگ براس ءِ جنگی بودناکی ءَ گیشتر مھکم کنت۔ دژمن ءِ انٹلیجنس ءِ دزرس سرجم ءَ ھلاس کنگ، آئی جنگی سنگرانی نزور کنگ ءُ جنگی مڈیانی پہ نشانگ کنگ ءَ یک شر ءُ مھمکیں گامگیجے ٹھینگ بیتگ۔ ایشی سر ءَ زوتاں چہ زوت کار بندات کنگ بیت۔
جارکش ءَ گوشتگ کہ بلوچ ءِ مڈیانی لٹ ءُ پلیں پاکستان ءُ چین ءِ باپاریانی لٹ ءُپلیں شوربندی ءُ زورگریں پاکستانی لشکر ءِ ساڑی بوگ ءِ بگیری ءَ گھگیری ءِ گیشتر مھکم کنگ ءِ سوڑگ کرتگ کہ بلوچستان ءِ درسیں شھدگانی سر ءَ دگ بندیاں گیشتر ترند کن ایں دانکہ ریاست ءِ لاجسٹک، مالی ءُ لشکری نپ تباہ کنگ بہ بنت۔ گوں ایشی ھواری ءَ جتا جتائیں ھندانی تہ ءَ نوکیں کارشونیءِ بنیاد ءَ آپریشن ٹھینتگ اَنت کہ آ پہ دژمن ءِ تر ءُگرد ءُ بنجاھانی سر ءَ زور ءَ گیشتر کنت۔
آئی ءَ گوشتگ کہ بلوچ راجی جیڑہ ءِ پہ میان استمان ءَ دیم ءَ آرگ ءَسپارتکاری ءِ نوکیں کارشونی ٹھینگ ءَ ایں۔ پاکستان ءُ چین ریاست ءِ زوراکی، بلوچ چکچینی، زوریں بیگواھی، لشکری زوراکی، لٹ ءُ پلی شوربندیاں میان استمانی تک ءَ پہ یک جوانیں وڑے ءَ پیش کنگ ءَ یک سرجمیں سپارتی تکشامے بندات کنگ بیت۔ اے بابت ءَ براس میان استمانی سپارتی ادارہ، انسانی ھکانی گل ءُ جتائیں میان استمانی توانمندانی گون ءَ ھالکاری ءِ گیش کنگ ءِ سر ءَ دلگوش دنت۔
آئی ءَ گوشتگ کہ پہ رسانکدر ءِ گیشتر شر کنگ ءَ ھم جوانیں سوڑگ زورگ بیتگ۔ گھگیری رسانکدر ءَگوں نوکیں لوٹاں ھمگرنچ کنگ، میان استمانی ھالکاری ادارھانی گون ءَ رھوت ءِ مھکم کنگ ءُ چاگردی رسانکدر ءَ بلوچ ءِ گپ ءِ پہ گیشتر توانمند کنگ ءُ دیم ءَ آرگ ءَ نوکیں گامگیج زورگ بیت، دانکہ دژمن ءِ پندل پروش دیگ بہ بیت ءُ بلوچ زرمبشت گوں وتی راستیں مول ءَ جھان ءِ دیم ءَ پدر کنگ بہ بیت۔
جارکش ءَ گوشتگ کہ براس ءَ پہ درسیں جھدکاراں لیکھی ءُ لشکری ھیلکاری ءَ یک جوانیں شونداتے ٹھینتگ۔ اے شوندات ءِ پارست ءَ ھمک سرمچار ءِ نہ تیوک ءَ جنگی بودناکی گیشتر شر کنگ بیت بلکیں آئی ءَ راجی لیکہ، آشوبی راجکاری ءُ دژمن ءِ مکاری پندلانی بگیری ءَ لیکی ءُ کردی بنیاد ءَ شیوار کنت۔ ھمک جھدکار ءَ ھمے مارشت دیگ بیت کہ اے جھد تیوک ءَ یک ٹولی یا گلے ءِ نہ اِنت بلکیں بلوچ راجی آجوئی اِنت ءُ ھمے پگر زرمبشت ءِ تہ ءَ پرشتءُ پروش ودی کنت۔
آئی ءَ گوشتگ کہ پہ چیرجنگی ءِ گیشتر دیمروئی دیگ ءَ تاوانانی گیش ءَ چہ گیش کنگ ءَ پہ شریں آسرے ءَ یک جوانیں راھبندے ٹھینتگ۔ ھمے کارشونی ءِ پارست ءَ پہ دژمن ءِ گیشتر زور دیگءَ مھمکیں آپریشانی راھبنداں ٹھینگ ءَ ایں۔ وھدے کہ پہ جنگی کاروائیاں ٹیکنالوجی ءِ گیش ءَ چہ گیش کارمرز کنگ ءِ شونداتءَ کردی درشم دیگ ءَ ایں۔ براس ھمے گپ ءِ سدکی ءَ دنت کہ گھگیری ھمک گام انچیں وڑے ءَ چست کنگ بیت کہ دژمنءَ باز تاوان بہ بیت ءُ سرمچارانی جانی تاوان کم بہ بیت۔
جارکش ءَ گوشتگ کہ درسیں ھم سنتیں گلانی گون ءَ آدگہ آجوئی لوٹوکیں گلانی رھوتکاری ءَ گیشتر مھکم کن ایں ءُ آیاں براس ءِ راھبند ءِ سر ءَ یکجاہ کنگ ءِ یک جوانیں جھدے کنگ بیت۔ دیوان ءَ ھمے گپ ءِ سر ءَ زور دیگ بیتگ کہ بلوچ راجی گھگیریءِ گیشتر شاھگاں کنگ ءُ ھمک پڑا ایشی مھکم کنگ ءَ ھرپیمیں ٹولیانی مارشت یکر کنگ ءُ راجی جھد سکا دلگوش دیگ بہ بیت۔
آئی ءَ گوشتگ کہ براس ءِ لیکہ تچک اِنت کہ بلوچ راجی آجوئی ءِ مانزماں تیوک ءَیک ھواریں، مھکم ءُ گوں جوانیں راجی لشکرے ءَ بندوک اِنت۔ گوستانک ءَ پدر کرتگ کہ آجوئی زرمبشت ھما وھد ءَ سوبین بنت چہ جتائیں کاروائیاں در بہ کپ اَنت ءُ یک مھکمیں لشکری سروکے ءِ رد ءَ یکجاہ بہ بنت۔ براس ھمے لیکہ ءَ دیم ءَ برگ ءَ اِنت دانکہ بلوچ راجی زرمبشت ءَ یک جوانیں بنیادے دیگ بہ بیت ءُ دژمنءِ ھمک پندل بے سوب کنگ ءُ بلوچ راجی آجوئی زوت گرگ بہ بیت۔
جارکش ءَ گوشتگ کہ بلوچ مڈیانی سر ءَ زورگپتی ءَ ھچ وڑ ءَ نہ من این ءُ براس ھمے چیز ءِ سدکی ءَ دنت کہ چین ءَ ھوار چونیں ھم لشکری توانمندے گوں پاکستان ءَ ھوار مہ بیت ءُ بلوچ ءِ مڈیاں لٹءُ پل مہ کنت۔ براس ءَ اے سوڑگ کرتگیں جنگی، سپارتکاری ءُ لیکھی بھر ءَ ھوار بوگ ءَ کول کرتگ ءُ نوں اے جنگ گیشتر گوں ترندی ءُ نوکی ءَ مڑگ بیت، دانکہ بلوچ راجی آجوئی راست کنگ بہ بیت۔
